कांग्रेसका नेता बडूले ठेक्का लिएको नारायणगढ–मुग्लिन सडकमा प्रधानमन्त्रीले अनुगमन गर्दै किन दिए टालटुले निर्देशन

प्रधानमन्त्री शेरबहादुर देउवाले नारायणगढ–मुग्लिन सडक निर्माण चाँडो सक्न निर्देशन दिएका छन ।
नारायणगढ–मुग्लिन सडकखण्डको आज स्थलगत अनुगमन निरीक्षण गर्दै प्रधानमन्त्री देउवाले निर्माण चाँडोभन्दा चाँडो सक्न सडक आयोजनाका कर्मचारी र निर्माणमा संलग्न ठेकेदारलाई निर्देशन दिए। ठेकेदार कांग्रेसका महासमिती सदस्य पिताम्बर बढु हुन्। देउवा संगैको तस्बिरमा देखिएका दाह्रीवाल बढुकै भागमा परेको स्थानमा काम नभएको हो। तर देउवाले मिलाएर काम गर्न भनेको र कडी कडाउ नगरेको भ्रमण दलमा संलग्न एक कर्मचारीले बताए।

“यो लाइफ लाइनको बाटो हो, जनताले धेरै दुःख पाएका छन् । निर्माण चाँडो सक्नुपर्छ,” उनले भने , “सडक निर्माण गर्न सरकारले गर्नुपर्ने सहयोग गर्छ ।” प्रधानमन्त्री देउवा बिहान १० बजे काठमाडौँदेखि हेलिकप्टरमा भरतपुरको आँपटारी पुगेका थिए । उनले आँपटारीदेखि दासढुंगासम्मको करिब २० किलोमिटर सडकखण्डको स्थलमार्ग हुँदै निरीक्षण तथा अनुगमन गरेका थिए ।

दासढुंगामा प्रधानमन्त्री देउवाले सडक आयोजना र निर्माणमा संलग्न ठेकदारसँग छलफल गरेका थिए । सो अवसरमा दुवै पक्षले अहिलेसम्म भएको प्रगतिबारे उनलाई जानकारी गराएका थिए ।