आयोगले भरतपुरमा चुनाब गराउन थाल्यो तयारी, कुन दिन हुने भयो त चुनाब ?

सर्वोच्च अदातले भरतपुर महानगरपालिका वडा नं. १९ मा पुनः मतदानको फैसला गरेसँगै त्यहाँ कहिले मतदान हुन्छ भन्ने प्रश्न चासोको विषय बनेको छ । निर्वाचन गराउने जिम्मेवार निकाय निर्वाचन आयोगले अदालतको आदेशसँगै भरतपुर १९ मा मतदानको प्रक्रिया सुरु गरिने जनाएको छ ।

निर्वाचन आयोगका प्रवक्ता सूर्यप्रसाद शर्माले मतदानको मितिबारे आज निर्णय हुने जानकारी दिएका छन् । आइतबार कार्यालय समय सकिएपछि अदालतको फैसला आएकोले मतदानबारे सोमबार कार्यालय खुलेपछि छलफल गरिने उनले जानकारी दिए । मतदानको मिति सोमबारै तोकिने सम्भावना बलियो भएको उनले बताए । अदालतको फैसलामा गरिएको निर्देशनलाई आधार मानेर सोही अनुसार मतदानको मिति तोकिने शर्माको भनाइ थियो ।

यसअघि निर्वाचन आयोगले जेठ २० गते भरतपुर १९ मा पुनः मतदानको निर्णय गरेको थियो । आयोगको निर्णय बदर गराइपाउँ भनी जेठ २१ मा सर्वोच्च अदालतमा परेको रिटउपर लामो बहस र सुनुवाइपछि सर्वोच्च अदालतले हिजो आइतबार निर्वाचन आयोगको निर्णयलाई सदर गरेको हो ।