भू-माफियाको तोडिने भयो संयन्त्र, मन्त्रीले सुनाए सबैलाई धनी बनाउने यस्तो मन्त्र

भूमिसुधार मन्त्री गोपाल दहितले धनी र गरिब दुवैको हित हुने गरी भूमि सुधार गर्ने बताएका छन् । मन्त्री दहितले भूमि नीति र ऐनहरु परिमार्जन गरेर सबैलाई धनी बनाउने बताएका हुन् । दोश्रो पटक भुमि सुधार मन्त्री बनेका दहितले आज बिहान एक रेडियो लाइ अन्तर्वार्ता दिदै सो कुरा बताएका हुन्।

सबैलाई आधारभूत आवश्यकता परिपूर्ति गर्न सक्ने भूमि नीति ल्याउने मन्त्री दहितको दाबी छ । मुक्त कमैया, कमैया, सुकुम्बासी, कमलरी, हरुवा, चरुवा लगायतको आधारभूत आवश्यकता पूरा गर्दै ठूला व्यवसायका समस्या पनि समाधान गर्ने योजना रहेको मन्त्री बताए ।

उद्योग व्यवसाय गर्नेका लागि समेत नयाँ नीति हितकर हुने दाबी गर्दै मन्त्री दहितले भने, “हदबन्दीभन्दा बढि जग्गा राज्यलाई कर तिर्दै उपभोग गर्न पाउनेसम्मको नीति बनाउने मेरो प्राथमिकतामा छ ।”
भूमाफियाहरुलाई नियन्त्रण गरेर कानुनी दायरामा ल्याउने समेत दहितको दाबी छ । उनले भने, “ आजैदेखि दिन गन्नुस्, मेरो कार्यकालभित्रमा भू माफियाहरु नियन्त्रित हुनेछन् ।” अबका दिनमा भू माफियाहरुको दिवा सपना पूरा नहुने चेतावनी मन्त्री दहितले दिएका छन् । फोरम लोकतान्त्रिक बाट दहित मन्त्री बनेका हुन्।