राजपा र एमालेले पार्क भिलेजमा के पकाए ? बालुवाटारमा एमालेलाई ककस्ले फकाए ?

एमालेले संविधान संशोधन असफल पार्ने निर्णय गरेलगत्तै सत्तारुढ प्रमुख तीन दलबीच आज छलफल हुँदैछ । प्रधानमन्त्री निवास बालुवाटारमा हुन लागेको छलफलमा कांग्रेस, एमाले र माओवादी केन्द्रका शीर्ष नेताहरू सहभागी भएका छन् ।

संसदमा दर्ता भएको संविधान संशोधन प्रस्तावमा सहमति जुटाउन मुख्य तीन दलबिच छलफल हुन लागेको प्रधानमन्त्रीको निजी सचिवालयले जनाएको छ । सत्तारुढ कांग्रेस र माओवादीले आन्दोलनरत राष्ट्रिय जनता पार्टी (राजपा) नेपालको मागअनुसार संविधान संशोधन पारित गर्न चाहे पनि एमाले संविधान संशोधनको विपक्षमा छ ।

एमालेको सोमबार सम्पन्न स्थायी समिति बैठकले संविधान संशोधन असफल पार्ने निर्णय गरेको थियो । त्यसलगत्तै प्रधानमन्त्रीले संशोधनमा एमालेलाई पनि मनाउन तीन दलको बैठक बोलाएका हुन् । यसअघि प्रधानमन्त्री शेरबहादुर देउवाले संविधान संशोधनबारे राजापा, राप्रपालगायतका दलसँग छलफल गरिसकेका छन् ।
एमाले र राजपाका दोस्रो तहका नेताहरूबीच बुढानिलकण्ठस्थित पार्क भिलेज रिसोर्टमा दुई दिन एक रात संविधान संशोधनका विषयमा सहमति जुटाउन छलफल भएको थियो । तर, त्यसबारे अहिलेसम्म कुनै जानकारी राजापा र एमालेका नेताहरूले दिएका छैनन् ।
देउवा संविधान संशोधनपछि मात्र मन्त्रिपरिषद् विस्तार गर्ने र निर्वाचन क्षेत्र निर्धारण आयोग बनाउने तयारीमा छन् । निर्वाचन आयोगले साउन १५ गतेदेखि निर्वाचन क्षेत्र निर्धारण गरिसक्न सरकारलाई भनेको छ । तर सरकारले अहिलेसम्म आयोग बनाउन सकेको छैन ।