राताम्मे भयो सेयर बजार, ६९ करोड ३५ लाखको कारोबार
काठमाण्डौं । मौद्रिक नीति सार्वजनिक भएको भोलिपल्ट सेयर बजार राताम्मे भएको छ । सोमबार नेप्से सूचक ८.९३ अंकले तल झरेर १५७५.२२ विन्दुमा आइपुगेको छ । समग्रमा बजार ०.५६ प्रतिशतले तल झरेको हो । सूचक झर्दा पनि कारोबार रकम भने उत्साहप्रद नै छ ।
कुल १५० कम्पनीको ६९ करोड ३५ लाख रुपैयाँभन्दा बढीको सेयर किनबेच भएको छ । कुल २८ लाख ६५ हजार ९२ कित्ता सेयर कारोबार भएको छ । उत्पादनमूलकबाहेक बाँकी सबै समूहका सूचक तल झरेका छन् ।
उत्पादनमूलकमा भने ५५.७५ अंकको वृद्धि देखिएको छ । उता, सबैभन्दा धेरै बिमा सूचक भने ५९.६३ अंकले घटेको छ । यसैगरी, वाणिज्य बैंक समूहको सूचक पनि ८.७५ अंकले ओरालो लागेको छ ।
कारोबार रकममा सोल्टी होटेलले अग्रता लिएको छ । यो कम्पनीको ७ करोड ३३ लाख रुपैयाँभन्दा बढीको सेयर कारोबार भएको हो । कारोबार रकमकै आधारमा दोस्रो र तेस्रो स्थानमा क्रमशः नेपाल लाइफ इन्सुरेन्स र सेन्चुरी कमर्सियल बैंक परेका छन् । सेन्चुरीको मंगलबार बुक क्लोज भएकाले ४० प्रतिशत हकप्रद सुरक्षित गर्न पनि सेयर कारोबार बढेको अनुमान छ ।
