आज पनि तेश्रो पटक भरतपुरको मुद्दा सर्यो,सर्बोच्चलाई यस्तो आपत पर्यो

आजका लागी तोकिएको भरतपुर महानगरपालिकाको पुनः मतदान वा मतगणना गर्ने सम्बन्धि विवादमा परेको मुद्दाको सुनुवाइ हेर्न नभ्याउने भन्दै एक साताका लागि फेरि सारिएको छ । भतरपुर महानगरपालिकाको मतगणनाका क्रममा माओवादी केन्द्रका कार्यकर्ताले मतपत्र च्यातेपछि निर्वाचन आयोगले १९ नम्बर वडामा पुनः मतदान गर्ने निर्णय गरेपछि विवाद देखिएको हो । आयोगको पुनः निर्वाचन गर्ने निर्णय खारेज गर्दै पुनः मतगणना गर्नुपर्ने माग राखेर भरतपुर–१९ का एमाले उम्मेदवार गुन्जमान विक र अधिवक्ता तुलसी पाण्डेले सर्वोच्च अदालतमा रिट दायर गरेका थिए ।

उक्त रिटमाथि प्रारम्भिक सुनुवाई गर्दै न्यायाधीश चोलेन्द्र शमसेर जबराको इजलासले तत्काल पुनः मतदान गर्ने निर्णय कार्यन्वयन नगर्न निर्वाचन आयोगलाई अन्तरकालिन आदेश दिएको थियो । साथै यही असार ६ गते कामु प्रधानन्यायाधीश गोपाल पराजुली र हरिकृष्ण कार्कीको संयुक्त इजलासले ७ दिनभित्र भरतपुर–१९ को मतगणनाका क्रममा च्यातिएका मतपत्र, मतपत्र च्यात्ने माओवादी कार्यकर्तामाथिको मुद्दाको सक्कल मिसिल र निर्वाचन आयोगको सक्कल निर्णय पेश गर्न आदेश दिएको थियो । उक्त आदेशलाई कार्यान्वयन गर्दै असार १३ गते मागिएका सबै कागजातहरु सर्वाेच्च अदालतमा बुझाइएको छ । कागजात सबै बुझाइएको भएपनि सुनुवाइ भने हुन सकेको छैन ।

सोमबारका लागि न्यायाधीशद्धय ओमप्रकाश मिश्र र पुरुषोत्तम भण्डारीको इजलासमा पेशी तोकिएको थियो । तर, हेर्न नभ्याइने भन्दै साउन २ गतेका लागि सारिएको छ । हेर्न नभ्याउने भन्दै सारिएको यो तेस्रोपटक हो ।

भरतपुर महानगरपालिकामा कांग्रेस माओवादी गठबन्धनबाट मेयरमा माओवादीकी प्रचण्ड पुत्री रेणु दाहाल र एमालेका देवी ज्ञवाली रहेका छन् । पछिल्लो गणनामा एमालेका देवी ज्ञवाली माओवादीकी रेणु दाहाल भन्दा ७८४ मतले अगाडि थिए । भरतपुर–१९ नम्बरको आधा भन्दा बढि मत गणना भइसकेपछि मतपत्र च्यातिएको थियो भने २० नम्बर वडाको मतगणना गर्न नै बाँकी छ ।
निकै चासो र महत्वको साथ हेरिएको भरतपुर मतगणना सम्बन्धी मुद्दाको फैसला हुन अझै ढिलो हुने अनुमान गर्न थालिएको छ । हाल सर्वाेच्च अदालत कायम मुकाम प्रधानन्यायाधीश गोपाल पराजुलीले चलाइरहेका छन् । उनलाई प्रधानन्यायाधीश बनाउन न्यायपरिषद् र संवैधानिक परिषद्ले सिफारिस गरिसकेको छ । साथै केही दिनमै उनको संसदीय सुनुवाइ हुने तयारी छ ।

निकै महत्व र चासो रहेको भरतपुर प्रकरणको फैसला कायम मुकाय प्रधानन्यायाधीश पराजुली प्रधानन्यायाधीश भएपछि हुने अनुमान गरिएको छ । पराजुलीको संसदीय सुनुवाइ नसकिएसम्म सुनुवाइ नहुने स्रोतले जनाएको छ ।