तिन नयाँ क्लियरिङ बैंकले आइतबारबाट काम गर्ने
काठमाण्डौं । नेपाल स्टक एक्सचेन्जले थप ३ वटा क्लियरिङ बैंक सञ्चालन गर्ने अनुमति दिएपछि यिनीहरुले आइतबारबाट काम थाल्ने भएका हुन् । थपिएका नयाँ क्लियरिङ बैंकहरुमा नेपाल इन्भेष्टमेन्ट बैंक, प्रभु बैंक र सिद्धार्थ बैंक छन् ।
यीमध्ये नेपाल इन्भेष्टमेन्ट बैंकलाई मुख्य बैंकको (लिड बैंक) रुपमा छनोट गरिएको छ । तोकिएको मापदण्डको आधारमा यो बैंक प्रथम श्रेणीमा परेकाले यसलाई नै लिड बैंकको रुपमा छनौट गरिएको सीडीएस एन्ड क्लियरिङ लिमिटेडका प्रमुख कार्यकारी देवप्रकाश गुप्ताले जानकारी दिए । यो बैंकले असार १८ गतेदेखि हुने राफसाफ तथा फछ्र्योट मल्टिपल क्लियरिङ बैंकमार्फत नेट सेटलमेन्ट प्रणालीमार्फत काम गर्नेछ ।
सुरुमा सानिमा, बैंक अफ काठमान्डू, नविल, सिटिजन्स, प्रभु, एनआइसी एसिया, नेपाल इन्भेष्टमेन्ट, सिद्धार्थ, स्टान्डर्ड चार्टर्ड, सनराइज, एभरेष्ट र एनबी बैंकले क्लियरिङ बैंक सञ्चालनका लागि आशयपत्र पेस गरेपनि अन्तिम चरणमा यी ३ वटा बैंकमात्र छनोट भएका थिए । इन्भेष्टमेन्ट, प्रभु र सिद्धार्थले अनुमति पाएसँगै अब क्लियरिङ बैंकको संख्या ४ पुगेको छ ।
यसअघि ग्लोबल आइएमई बैंकबाट मात्र सेयर कारोबारको राफसाफ गर्नुपर्ने बाध्यता रहँदै आएको थियो । अब ब्रोकरले आफूले इच्छाएको बैंकबाट राफसाफ सम्बन्धी काम गर्न पाउनेछन् । क्लियरिङ बैंक थपिएपछि लगानीकर्तालाई पनि फाइदा हुनेछ । चेक राफसाफलगायतका काम गर्न एउटै बैंकमा निर्भर रहनु पर्दैन । प्रतिस्पर्धा हुने भएपछि काम पनि छिटोछरितो हुने विश्वास गर्न सकिन्छ ।
