काठमाडौँ / तीन प्रदेशका ३५ जिल्लास्थित ३ सय ३४ स्थानीय तहमा बुधबार सम्पन्न दोस्रो चरणको स्थानीय तह निर्वाचनमा कम्तिमा ७०.५ प्रतिशत मतदान भएको छ। सम्पन्न निर्वाचन लगत्तै निर्वाचन आयोगका प्रमुख आयुक्त अयोधीप्रसाद यादवले निर्वाचन पूर्ण रुपले सफल भएको भन्दै अझै यो प्रारम्भिक प्रतिशतमा बृद्धि हुन सक्ने बताए।
आयोगमा आयोजित पत्रकार सम्मेलनमा प्रमुख आयुक्त यादवले आज भएको निर्वाचनमा बझाँङको जयपृथ्वीबहादुर सिंह नगरपालिकाका तीनवटा मतदान केन्द्रमा बाहेक सबै जिल्लाका मतदान केन्द्रमा शान्तिपूर्ण र भयरहित वातावरणमा निर्वाचन सम्पन्न भएको बताए।
यादवले दिएको जानकारी अनुसार, सबै भन्दा बढी ८० प्रतिशत मतदान बाजुरा जिल्लामा भएको छ भने सबैभन्दा कम ६० प्रतिशत भोजपुरमा खसेको छ।
सोलुखुम्बुको नेचासल्यानको वडा नम्बर ६ मा मतदान अधिकृत पुगेर सबै प्रक्रिया पूरा गरी फर्किएको बताउँदै मतदान कार्यमा सहभागी हुने वा नहुने भन्ने मतदाताको अधिकार भएको उनले बताए।
नवलपरासीको एक मतदान केन्द्रमा २ मत मात्र खसेको उनले बताए। कुनै मतदाताले सहभागिता नजनाउदैमा निर्वाचन रद्द नहुने उनले बताए। राजपाले त्यहाँ अबरोध गरेको थियो।
