काठमाडौँ/ गैरराजनीतिक एवं संवैधानिक निकायका रुपमा चिनिएको र रहेको निर्वाचन आयोग भित्र अनियमितताको भण्डार भेटिएको छ। हिजो
मात्र सरुवामा परेका गोपीनाथ मैनालीले त्यहाँ भित्रको सबै पोल खोलेका छन् । आफुले भाग नपाएर हो अथवा सरुवाको रनाहामा परेर हो उनले सबै पोल खोले पछि आयोग बिबादको भुमरीमा फसेको छ। बिलासी गाडी नपाएको झोंकमा निर्वाचन आयोगले आफ्ना सचिव गोपिनाथ मैनालीको सरुवा गरेको कुरा सतहमा आएपनि साना तिना कुराले झन् विवाद बढाएको छ।
सचिव मैनालीका अनुसार कागज किन्ने, मसी किन्ने, मतपत्र छाप्ने लगायत निर्वाचन प्रयोजनका लागि प्राप्त पैशाले प्रमुख निर्वाचन आयुक्त डा. अयोधीप्रसाद यादव र आयुक्त इला शर्माले विलासी गाडी किन्न दबाब दिएको बताए। तर आफूले असहमति जनाएपछि आफ्नो सरुवा भएको उनले दाबी गरे।हाल प्रमुख निर्वाचन आयुक्त यादवसँग तीन वटा गाडी, आयुक्त शर्मासँग दुई वटा गाडी छन् भने बाँकी आयुक्तसँग एक एक ओटा गाडी छन्।
आयुक्त इला शर्माले ११ वर्ष पुरानो गाडी भएका कारण त्यसलाई प्रतिस्थापन गर्न नयाँ गाडी किन्न लागिएको दावी गरिन्। तर, अहिलेको स्थानीय निकायको चुनाव सुरु हुनुअघि निर्वाचन प्रयोजनको लागि भन्दै भारतले चारवटा गाडी दिएको थियो। यसअघि २०६४ को निर्वाचनमा चारवटा गाडी किनिएको थियो। २०७० को निर्वाचनमा पनि भारतले आयोगलाई चारवटा गाडी दिएको थियो। हाल निर्वाचन आयोगको केन्द्रीय कार्यालयसँग ८६ वटा गाडी छन्। आयुक्त इला अनेक काण्ड मा मुछिदै आएकी पात्र हुन् ।
प्रमुख निर्वाचन आयुक्त यादव र आयुक्त शर्माले काठमाडौंमा आफ्नो घर हुँदाहुँदै पनि घरभाडा लिँदै आएका छन्। सो विषयमा पनि सचिव मैनालीले आपत्ति जनाएका थिए। यी सबै कुरा सचिव मैनालीले मुख्य सचिव डा. सोमलाल सुवेदीलाई जानकारी गराएका थिए। बिहीबारको मन्त्रिपरिषद बैठकमा समेत मुख्यसचिव सुवेदीले सो कुरा राखेका थिए। उनले बैठकमा तत्कालको लागि गाडी खरिद र सचिवको सरुवा गर्न नहुने धारण राखेका थिए। सरुवा भएका सचिव नै पुनः ल्याउनुपर्ने अडान पनि उनले राखेका थिए। तर प्रधानमन्त्री शेरबहादुर देउवाले निर्वाचन गर्ने आयोगले भनेको कुरा मान्नुपर्ने बताएर सचिव मैनालीको सरुवा सदर गराएका थिए। कार्यालय प्रयोजनका लागि भन्दै दैनिक निकै फजुल खर्च भैरहेकोप्रति पनि आयोगमा झगडा उब्जिएको थियो। खाजा खर्चवापत हुने रकमको हिनामिना र घरपरिवार र नातागोतासम्मलाई आयोगको खर्चमा खानाखाजा पुग्ने गरेकोप्रति आयोग भित्रकै कर्मचारीले असहमति राख्दै आएका थिए। त्यसमध्येका मैनाली पनि एक हुन्।
प्रमुख निर्वाचन आयुक्त यादवले दैनिक खाजाबापत पाँच हजार रुपैयाँ लिने गरेको सचिव मैनालीले खुलासा गरे। एक जनाका लागि दैनिक पाँच हजारको खाजा खुवाउने विषयमा पनि सचिव मैनालीले असहमति राखेका थिए।
आयोग स्रोतका अनुसार प्रमुख आयुक्त यादवले चुनावी चटारो सुरु भएयता दैनिकजसो पाँच हजारको खाजा लिने र त्यो खाजा घरसम्म पठाउने गरेका छन्।
