भारतीय अण्डासँगै भित्रियो बर्डफ्लु
वीरगन्ज । भारतीय बजारबाट अण्डा भित्रिएपछि नेपालमा बर्डफ्लुको जोखिम बढेको छ । वार्षिक रु १५ करोड मूल्यभन्दा बढीको अण्डा उत्पादन हुने बारामा खुल्ला सीमाको कारण दिनहुँ भारतीय अन्डा भित्रिन थालेपछि बर्डफ्लुको जोखिम बढ्दै गएको हो ।
जिल्लाको दक्षिणी सीमावर्ती क्षेत्रसँग जोडिएको भारतको घोडासन, आदापुर तथा नेपाली नाका मटिहर्वा, कबैगोठ, सीमरौनगढ, कचोर्वालगायत नाकाबाट तस्करले साइकल, मोटरसाइकल र जिपमा ठूलो परिमाणमा सेतो अण्डा तस्करी गरी बाराको ग्रामीण भेगका बजारमा पुर्याउने गरेका छन् ।
जिल्ला पशुसेवा कार्यलय बाराका वरिष्ठ पशु विकास अधिकृत डा देवनन्नदन साह सुरक्षाकर्मीको लापरबाहीका कारण भारतीय अन्डा नेपाल भित्रिने गरेको बताएका छन् । तस्करले क्वारेन्टाइन चेक पोस्टमा कार्यरत सुरक्षाकर्मी र कर्मचारीलाई मासिक रुपमा घुस खुवाउने गरेकाले अण्डा तस्करी हुने गरेको नेपाली व्यापारीको आरोप छ ।
सशस्त्र प्रहरी सीमा सुरक्षा कार्यालय बाराका सशस्त्र प्रहरी उपरीक्षक कुमार न्यौपाने भने सीमा नाकामा व्यापक कडाइ गर्दै आएको बताउछन् । सरकारले भारतीय अण्डा आयातमा रोक लगाएको छ।
