झिनो अंकले बढ्यो नेप्से, ६७ करोड १८ लाख रुपैयाँको सेयर कारोबार
काठमाण्डौं। साताको अन्तिम दिन बिहीबार सेयर बजार बढेको छ। अघिल्लो दिनको तुलनामा कारोबार रकममा पनि वृद्धि भएको छ । ४.८० अंकको बढोत्तरीसँगै नेप्से सूचक १५५९.४९ अंकमा पुगेको हो।
बिहीबार १३९ कम्पनीका १५ लाख ७७ हजार कित्ता सेयर ६७ करोड १८ लाख रुपैयाँमा खरीद बिक्री भएका छन्। आज सबैभन्दा बढि प्रभु बैंकको संस्थापक सेयर खरीदबिक्री भएको छ। १९० रुपैयाँ प्रति कित्ताका दरले १४ करोड १२ लाख रुपैयाँ बराबरको सेयर किनबेच भएको हो। यसपछि एभरेष्ट बैंक चार करोड १५ लाख रुपैयाँको किनबेच भएको छ।
आठ समुहको कारोबारमा सात समुहमा वृद्धि देखिएको छ भने बीमा ३३.७५ अंकले घटेको छ। बैंक ६.०१, होटल १९.८६, बिकास बैंक ११.३६, जलबिद्युत १२.७३, फाइनान्स ३.८४, उत्पादनमुलक ३.४९ र अन्य ०.२९ अंकले बढेको छ।
युनाइटेड फाइनान्सका शेयरधनीले सबैभन्दा बढी ६ प्रतिशत कमाएका छन् भने सप्तकोशी डेभलपमेन्ट बैंकका शेयरधनीले करिब सात प्रतिशत गुमाएका छन्।
