समितिका सभापति सूर्य थापासहित मितेरी सहकारीको स्थलगत निरीक्षण

 

 

सहकारी ठगी प्रकरणमा मुछिएका कांग्रेस उपसभापति तथा पूर्वकानूनमन्त्री धनराज गुरुङले श्रीमतीसँग ५ वर्षअघि सम्बन्ध बिच्छेद भएको भने पनि कतिपय घटनाक्रमले उक्त सम्बन्ध बिच्छेद नक्कली हुने आशंका देखाएका छन् । सहकारी बचत अपचलनसम्बन्धी घटनाहरूको छानबिन गर्न एमाले सांसद सूर्य थापाको नेतृत्वमा गठित संसदीय छानविन विशेष समितिका सदस्यहरूले धनराज दम्पतीको ‘सहकारी डिभोर्स’ मात्र भएको टिप्पणी गरेका छन् । विहीबार समितिका सभापति सूर्य थापासहितका सदस्यहरूले ललितपुरको महालक्ष्मीमा अवस्थित मितेरी सहकारीको स्थलगत निरीक्षण गरेका छन् । त्यसक्रममा सहकारीका अध्यक्ष कुम्भराज गुरुङसँग धनराज दम्पती जोडिएको १५ करोड बचत अपचलनको विषयमा समेत सोधपुछ गरेको छ । समितिका सभापति थापाले १६ वटा समस्याग्रस्त सहकारीको स्थगलत निरीक्षण गर्ने क्रममा मितेरीमा समेत गएर अध्यक्ष कुम्भराजसँग सोधपुछ गरिएको बताए । डिभोर्स भएको भनिए पनि श्रीमतीको नाममा रहेको ऋण धनराज आफैंले आएर तिरेको सहकारीका अध्यक्ष गुरूङ बताए । उनले एक महिनाअघि मात्रै आएर धनराजले ऋणको पैसा तिरेको डिभोर्स नै नभएको बताएका छन् । कागजीरूपमा डिभोर्स भएको भनिए पनि वास्तविक नभएको उनको भनाइ छ । यसअघि समितमै बोलाएर पनि उनको बयान लिइएको थियो । त्यसक्रममा अध्यक्ष गुरुङले तत्कालीन महाप्रबन्धक ज्योति गुरुङले गरेको रकम हिनामिना र त्यसपछि धनराज आफैं सन्चालक समिति बैठकमा बसेर रकम फिर्ता गर्ने भनी गरेको सम्झौताबारे जानकारी गराएका थिए । उनले एक महिनाजति अघिमात्र धनराजले डिभोर्स भएको भनिएकी श्रीमती ज्योतिको नाममा ऋण समेत तिरेको बताए । समितिका सदस्य राजन दाहालले सक्कली सम्बन्ध बिच्छेद नभएर सहकारी डिभोर्समात्र रहेछ भन्ने टिप्पणी गरे । स्रोतका अनुसार धनराजले मन्त्री भएका बेला ८० लाख रूपैयाँको चेकसमेत सहकारीमा जम्मा गरेका थिए । धनराजले भने २०७६ सालमै ज्योतिसँग सम्बन्ध बिच्छेद भइसकेको र ज्योतिले गरेको सहकारी बचत हिनामिनासँग आफ्नो सम्बन्ध नरहेको बताउँदै आएका छन् । ज्योति र धनराजले करीव ११ करोड रकम बिटक्वाइनमा लगानी गरेको र सो रकम बैंककमा बस्नेत भण्डारी थरका एक व्यवसायीमार्फत डुबेको बताइएको छ ।