टानको निर्बाचनमा सापकोटा समूहको पल्लाभारी
पर्यटन ब्यबसायीहरुको छाता संगठन ट्रेकिङ एजेन्सीज एशोसिएसन अफ (टान)यति बेला निर्बाचनमा होमिएको छ । आगामी कार्यकालका लागि नयाँ नेतृत्व चयनका लागि भदौ १७ गते हुने निर्बाचनमा आफ्नो पक्षलाई बिजयी गराउन पर्यटन ब्यबसायीहरु यतिबेला तीब्र दौडधूपमा छन् । टानको आगामी नेतृत्वका लागि यस पटक दुई समूह चुनावी प्रतिस्पर्धामा छन् । एउटा समूहको नेतृत्व पर्यटन ब्यबसायी राजेन्द्र प्रसाद सापकोटा र अर्को समूहको नेतृत्व सागर पाण्डेले गरेका छन् । सापकोटा समूहबाट वरिष्ठ उपाध्यक्षमा कर्मा शेर्पा,प्रथम उपाध्यक्षमा बिष्णु प्रसाद लम्साल,द्वितीय उपाध्यक्षमा सनम शेर्पा र महासचिवमा राजेन्द्र सुवेदीको दावेदारी छ भने पाण्डे समूहबाट वरिष्ठ उपाध्यक्षमा चोलेन्द्र कार्की,प्रथम उपाध्यक्षमा दावा लामा (तामाङ),द्वितीय उपाध्यक्षमा निशेष थापा र महासचिवमा सोनाम ग्याल्जेन शेर्पा प्रतिस्पर्धामा छन् । यी दुई समूहमध्ये यो निर्बाचनमा सापकोटा समूहको पल्लाभारी हुने संकेत देखिएको ब्यबसायीहरुबीच चर्चा चल्ने गरेको छ । एकातिर मुलुकका दुई ठुला राजनीतिक दल नेपाली कांग्रेस र नेकपा एमाले सम्बद्ध ब्यबसायीहरुबीच चुनावी गठबन्धन हुनु तथा सरकार र व्यबसायीबीचको पुलको काम गर्न सक्ने व्यक्तित्वहरु सापकोटा समूहबाट उम्मेदवार भएका कारण पनि सो समूह निर्बाचित हुने तर्क उनीहरूको छ।पर्यटन क्षेत्रमा देखिएका बग्रेल्ती समस्याहरुको समाधानका लागि पहल र व्यबसायीहरुको हकहितको पक्षमा डटेर मुकाविला गर्न सक्ने भावी नेतृत्व यतिबेला पर्यटन व्यबसायीहरुको रोजाइ हो । ट्रेकिङ एजेन्सीज एशोसिएसन अफ नेपाललाई गतिशील र पर्यटन व्यबसायलाई मर्यादित बनाउनु आफुहरुको मुख्य प्राथमिकता रहने सापकोटा समूहबाट वरिष्ठ उपाध्यक्षका उम्मेदवार रहनु भएका सफल पर्यटन व्यबसायी कर्मा शेर्पाको भनाई छ । ‘वैदेशिक रोजगारीका लागि बिदेशिने युवा जनशक्तिलाई स्वदेशमै रोक्न रोजगार शृंजना गर्नु अहिलेको प्रमुख आवश्यकता हो।पर्यटन क्षेत्रको बिकास र बिस्तारबाट मात्रै यो सम्भव छ’ वरिष्ठ उपाध्यक्षका उम्मेदवार शेर्पाले रहस्य खबरसंग भने-‘त्यसका लागि व्यबसायीहरुको हित हुने गरी नीति निर्माणका लागि प्रभावकारी भूमिका हामी निर्बाह गर्छौ । पर्यटन क्षेत्र २०३५ सालमा बनेको ऐनका भरमा अहिले चलिरहेको र निर्माणको चरणमा रहेको नयाँ ऐनका लागि व्यबसायीहरुलाई एकगठ गरेर त्यसको साझा निष्कर्षलाई त्यसमा समाबेश गर्न पहल गर्नु अहिलेको प्रमुख आवश्यकता रहेको शेर्पाको भनाई छ । स्थानीय तहहरुले मोटरबाटोको ट्र्याक ओपन गर्दा जताततै डोजर चलाउँदा कतिपय स्थानमा पुराना पर्यटन पदमार्ग हराएका कारण नयाँ पदमार्गहरुको खोजी,पदमार्गको निर्माण र स्तरोन्नति,टीम्सबाट आम्दानी हुने रकम समेतलाई पर्वतीय पर्यटन श्रमिकहरुको सुबिधा र सामाजिक सुरक्षाको बिषय,पोर्टर सेल्टरहरुको निर्माण तथा अन्तर्राष्ट्रिय पर्बतीय पर्यटन प्रबर्द्धन गर्न टानको सिफारिस र सहभागिता सुनिस्चित गर्ने कुरा आफुहरुको मुख्य प्राथमिकता रहेको वरिष्ठ उपाध्यक्षका उम्मेदवार शेर्पाले बताए ।
