नेकपा एसका ६७ जना नेता-कार्यकर्ता एमालेमा प्रवेश
नेकपा (एकीकृत समाजवादी) झापाका ६७ जना नेता कार्यकर्ता नेकपा एमालेमा प्रवेश गर्नुभएको छ । एमाले अध्यक्ष एवम् प्रधानमन्त्री केपी शर्मा ओलीको गृह जिल्ला झापा निर्वाचन क्षेत्र न. ५ बाट ६७ जना नेताकार्यकर्ता एमालेमा प्रवेश गर्नुभएको हो । मेची बहुउद्धेश्यीय सहकारी संस्था दमकको सभाहलमा आज पत्रकार सम्मेलन गरी नेकपा एकीकृत समाजवादीका कोशी प्रदेश कमिटी सदस्यहरु राजेन्द्र दाहाल, मणी भण्डारी सहितका जिल्ला,नगर,पालिका र जनसंगठनका ६७ जना नेता कार्यकर्ता एमालेमा समाहित हुनुभएको हो । एकीकृत समाजवादी पार्टी छोडेर घर फर्किएकाहरुलाई एमाले केन्द्रीय सदस्य तथा झापा इन्चार्ज रोमनाथ ओली र केन्द्रीय सदस्य दिपक कार्की लगायतले खदा लगाएर स्वागत गर्नु भएको थियो ।
