नेकपा एसको महाधिवेशनमा ओली नजाने
नेकपा एसको महाधिवेशनमा नेकपा एमालेका अध्यक्ष केपी शर्मा ओलीले नजाने भएका छन् । नेकपा एसले महाधिवेशनमा अतिथिका लागि ओलीलाई पनि निम्ता पठाएको थियो । बालकोट स्रोतका अनुसार नेकपा एसको महाधिवेशन उद्घाटन समारोहमा अध्यक्ष ओली नजाने निश्चित छ । बरु त्यसबेला पार्टीको कृषि विभागको कार्यक्रममा जाने तय भएको स्रोतले जनाएको छ । नेकपा एसको अस्तित्वलाई नेकपा एमालेले अझै पनि स्वीकार गर्न चाहेको छैन । राष्ट्रिय पार्टी समेत नरहेको दलको महाधिवेशनमा एमाले अध्यक्ष जाने कुरा नहुने एक स्थायी कमिटी सदस्यले बताए । नेकपा एसका दस्तावेजमा एमालेलाई प्रमुख दुश्मनको रुपमा चित्रण गरेर ओलीलाई गालिगलौज गरिएको र माधव नेपालले एक दिन अघिसम्म पनि एमाले फुटाएर ऐतिहासिक काम गरियो भनिरहेकाले त्यस्तो दलको अतिथी बन्न नसकिने ती नेताको भनाइ छ । एमालेबाट अरु कोही नेताले महाधिवेशन उद्घाटन समारोहमा शुभकामना दिने सम्भावना पनि निश्चित नरहेको स्रोतले जनाएको छ । अध्यक्षले अन्तिममा कसैलाई पठाउने वा कोही पनि नजाने दुवै सम्भावना उत्तिकै रहेको एमाले स्रोतले जनाएको छ ।
