एमाले संसदीय दलको बैठकमा के-के भयो छलफल
नेकपा एमालेको संसदीय दलको बैठक बसिरहेको छ । संघीय संसद् भवन नयाँ बानेश्वरको ल्होत्से हलमा बैठक चलिरहेको प्रमुख सचेतक महेश बर्तौँलाले बताए । बैठकलाई पार्टी अध्यक्ष केपी शर्मा ओलीले सम्बोधन गरेका छन् । ओलीको सम्बोधनपछि बैठकमा पछिल्ला समसामयिक राजनीतिक घटनाक्रमबारे छलफल हुनेछ । प्रमुख प्रतिपक्ष दल नेपाली कांग्रेसले उपप्रधान तथा गृहमन्त्री रवि लामिछाने जोडिएको सहकारी ठगी प्रकरणको छानबिन गर्न संसदीय समितिको माग गर्दै निरन्तर सदन अवरोध गर्दै आइरहेको छ । सरकारले सदनमा पेस गरेको नीति तथा कार्यक्रमलाई अगाडि बढाउने विषयमा बैठकले निर्णय लिनेछ। साथै आगामी बजेटका विषयमा पनि बैठकमा छलफल हुनेछ । सांसद नभए पनि महासचिव शंकर पोखरेल र पूर्व अर्थमन्त्री डा. युवराज खतिवडा पनि सहभागी छन् ।
