१० सीट भएको पार्टीले के प्रधानमन्त्रीको कुरा गर्नु : ओली
नेकपा एमालेका अध्यक्ष केपी शर्मा ओलीले पुष्पकमल दाहाल प्रचण्ड नेतृत्वको सरकार ढाल्ने प्रयास निरन्तर भइरहेको दाबी गरेका छन् । संसदीय दलको बैठकलाई सम्बोधन गर्दै अहिले पनि राजनीतिक अस्थिर रहेको बताए । उनले भने- राजनीति अस्थिर छ । पोहोरको झैं दुई महिनामा सरकार उल्ट्याउने खेल भइरहेको छ उनले नेकपा एसका अध्यक्ष माधव नेपाललाई लक्षित गर्दै भने, १० सीट भएको पार्टी राष्ट्रिय पार्टी होइन । त्यस पार्टीको प्रतिनिधिले विश्वासको मत दिने बेलामा भएको छलफलमा म सम्झिरहेको छु । आक्रोशित र कुण्ठाग्रस्त थियो । त्यही कुरा यस बीचमा म प्रधानमन्त्री हुँदैछ भनेर कसैलाई भतभत पोलेको छ भने, कहाँ प्रधानमन्त्री हुन आँटेका हुन् ? त्यसैले अस्थिरता ल्याउने कोशिस लगातार भइरहेको छ । उनले अस्थिरता ल्याउने प्रयासलाई असफल पार्नको लागि उपेन्द्र यादव नेतृत्वको जसपा नेपाल विभाजन भएको बताए । उनले भने- अस्थिरता ल्याउने प्रयासलाई असफल पार्नको लागि एउटा पार्टी विभाजन भएको छ । उहाँहरूको अभिव्यक्ति सुन्नुभयो होला । यो समीकरण ढाल्न लागेपछि हामीले सहमत हुन नसकेपछि विभाजन गर्यौँ भनिराख्नुभएको छ ।
