कांग्रेसले २०८१ सालभरि सिंहदरबारतिर आँखा लगाउन हुँदैन – गगन थापा
नेपाली कांग्रेसका महामन्त्री गगनकुमार थापाले आफ्नो पार्टीले यो २०८१ सालभर बालुवाटार र सिंहदरबारतिर आँखा लगाउन नहुने बताएका छन् । समुदायमा कांग्रेस अभियान अन्तर्गत हुलाकी राजमार्ग केन्द्रित संवाद यात्राका क्रममाा बाँके आइपुगेका थापाले सो कुरा बताएका हुन् । व्यवसायीसँग संवाद गरे । प्रजातान्त्रिक उद्योगी व्यवसायी संघ बाँकेले आयोजना गरेको उद्योगी व्यवसायी संवादमा उनले उद्योगी व्यवसायीका समस्या र गुनासा सुने । थापाले यी समस्या र गुनासा काठमाडौँ पुगेर प्रधानमन्त्री र शीर्ष नेतृत्व समक्ष राखेर समाधानका लागि पहल गर्ने बताए । आफू एक जना सांसद पनि भएको नाताले संसदमार्फत पनि सरकारको ध्यानाकर्षण गराउने थापाको भनाइ छ । उद्योगी व्यवसायीले सरकारको नीति, आर्थिक संकट, लगानीमैत्री वातावरणको अभाव, उत्पादनको उचित बजार अभाव लगायतका कारण आफूहरुले बेहोर्नु परिरहेको समस्या राखेका थिए ।
