मन्त्रीहरूसहित एमाले अध्यक्ष ओली ओलाङचुङगोलामा
पूर्वप्रधानमन्त्री तथा नेकपा एमालेका अध्यक्ष केपी शर्मा ओली सुदूरपूर्वको नेपाल-चीन सिमाना ओलाङचुङ्गोला पुगेका छन् । उपप्रधानमन्त्री तथा भौतिक पूर्वाधार मन्त्री रघुवीर महासेठ, ताप्लेजुङका सांसद समेत रहेका पार्टी सचिव योगेश भट्टराई र रक्षामन्त्री हरि उप्रेतीसहित ओली तमोर कोरिडोर अवलोकनका लागि गएका हुन् । ओलीलाई ओलाङचुङ्गोलामा स्थानीयले स्वागत गरेका छन् । ओलीले तमोर करिडोरको अवलोकनका साथै टिप्तला नाकाको स्थलगत अनुगमनको कार्यक्रम समेत रहेको युवा संघका केन्द्रीय अध्यक्ष क्षितिज थेबेले बताए । एमाले नेता तथा आदिवासी जनजाति महासंघका अध्यक्ष पासाङ शेर्पा,युवा संघ अध्यक्ष थेबेलगायतका नेताहरूले ओलीलाई स्वागत गरेका छन् ।
