गृह मन्त्रालय नछाड्ने मनस्थितिमा रास्वपा
माओवादीले दाबी गरे पनि रास्वपा गृह मन्त्रालय छोड्ने पक्षमा छैन । यदि रास्वपाले अडान लियो भने प्रधानमन्त्रीले अस्वीकार गर्न कठिन हुने छ, किनकि रास्वपाको समर्थनबिना वर्तमान सरकार अल्पमतमा पर्छ । रास्वपाका एक शीर्ष नेताले भने, ‘हामीले गृह छोड्ने प्रश्नै आउँदैन । उहाँहरू पहिल्यै सहमत पनि भइसक्नुभएको छ । बीच-बीचमा अनेक कुराहरू आउँछन् । तर, गृहमा सभापतिज्यू नै जानुहुन्छ । रास्वपाले गृहसहित चार वटा र माओवादीले पाँच वटा मन्त्रालयमा दाबी गरिरहेका छन् । जसपाको दाबी ३ मन्त्रालयमा छ । नेकपा एसलाई पनि समेट्नुपर्ने भएकाले प्रधानमन्त्रीलाई सबैको चित्त बुझाउन सजिलो छैन । सरकारमा सहभागी हुने दलहरूको टुंगो लागेपछि मात्रै मन्त्रालय बाँडफाँट गर्ने भनिएको छ । गठबन्धनमा सामेल चार दलसहित नेकपा एस, नागरिक उन्मुक्ति, जनमत, र लोसपा पनि सरकारमा भित्रिन आतुर छन् ।
