कांग्रेस महासमिति बैठकमा नाराबाजी
नेपाली कांग्रेसको महासमिति बैठकमा नाराबाजी भएको छ । गण्डकी र बागमती समूहबाट आएका सुझावहरु समापन कार्यक्रममा बागमतीका सभापति इन्द्र बानियाँले पस्तुत गर्दा नाराबाजी भएको हो । बुधबार र विहीबार प्रतिनिधिहरुले राखेका विचारहरु भन्दा फरक तरिकाले बानियाँले समूहको सुझाव पढेपछि महासमिति सदस्यले नाराबाजी गरेको एक नेताले भने । चुनावी गठबन्धन गर्न हुँदैन भन्ने सुझाव राख्ने समूहमा ठूलो संख्या छ । उनले सुझावहरु एकमुष्ट गरेर प्रतिवेदनका रुपमा पढ्दा गठबन्धनको विपक्षमा खासै मत नआएको पढ्नुभयो,’ गण्डकी र लुम्बिनी समूहमा रहेका एक नेताले जानकारी गराए । प्रदेश सभापति बानियाँको प्रतिवेदन सच्याउनुपर्ने माग सहित उठेर सहभागीले विरोध गरेपछि केही समय समापन कार्यक्रम प्रभावित भएको थियो । महामन्त्री गगन थापाले प्रदेशबाट आएका सबै प्रकृतिका सुझावहरु सम्मिलित गरेर अन्तिम निर्णय आउने आश्वास दिएपछि नाराबाजी रोकिएको सहभागी प्रतिनिधिले जानकारी गराए ।
