नेपाल आयल निगमको कार्यकारी निर्देशकमा तीन जनाको नाम सिफारिस
नेपाल आयल निगमको रिक्त कार्यकारी निर्देशक पदका लागि तीन जनाको नाम सिफारिस भएको छ । आवेदक १३ जनाको प्रस्तुतिपछि सर्ट लिस्ट गरिएको हो । आपूर्ति मन्त्रालय सम्बद्ध सार्वजनिक निकायमा पदाधिकारी नियुक्ति तथा मनोनयनसम्बन्धी निर्देशिका, २०७८ बमोजिम तीन जनाको नाम सिफारिस भएको र अब मन्त्रालयको सिफारिससहित पेश हुने प्रस्ताव अनुरुप एक जनालाई मन्त्रिपरिषद् बैठकले कार्यकारी निर्देशकमा नियुक्त गर्ने छ । आवेदकहरुले उद्योग, वाणिज्य तथा आपूर्ति मन्त्रालयका सचिवको कार्यकक्षमा आफ्नो प्रस्तुति दिएका थिए । कार्यकारी निर्देशकको निम्ति सिफारिस भएमध्ये गोरखाको भीमसेन थापा गाउँपालिका १ का डा. चण्डिकाप्रसाद भट्ट, चितवनको भरतपुर १४ का डोलप्रसाद चापागाईं र ललितपुर महानगर–२४ का शत्रुघ्नप्रसाद पुडासैनी छन् । भट्ट मन्त्रालयको विशेष आर्थिक क्षेत्र का कार्यकारी निर्देशक पनि हुन् । यसमध्ये भट्टको नियुक्ति पक्कापक्की रहेको बताइन्छ । उनी बूढानीलकण्ठ निकट भएकाले सोहीबमोजिम उद्योग,वाणिज्य तथा आपूर्तिमन्त्री रमेश रिजालको निर्देशनमा भट्टसहित तीन जनाको नाम सिफारिस गरिएको बुझिएको छ ।
