अरुण चौधरी हाजिरी जमानीमा छुट्ने संकेत
बाँसबारी छालाजुत्ता कारखानाको सरकारी जग्गा व्यक्तिको नाममा दर्ता गरेको अभियोगमा पक्राउ परेका व्यवसायी अरुण चौधरीसहित तीनै जना हाजिरी जमानी छुट्ने लगभग पक्का देखिएको छ । सोमबार काठमाडौं जिल्ला अदालतले दुई दिनभित्र अनुसन्धान सक्न र अनुसन्धान नसकिए पक्राउ गरिएकालाई हाजिरी जमानीमा छाड्न आदेश दिएको थियो । चौधरीसहित तीनै जना ५ दिनअघि पक्राउ परेका थिए । अदालतले पहिलो पटक ४ दिन र दोस्रो पटक २ दिनको समय दिएको थियो । दुई दिनको म्याद बुधवार सकिँदै छ । प्रहरीले हिरासतमा लिएर अनुसन्धान थालेको २५ दिनभित्र अभियोग पत्र दर्ता हुने कानूनी व्यवस्था छ । तर, अदालतले २ दिनमा नै अनुसन्धान सक्न आदेश दिएपछि प्रहरी असन्तुष्ट देखिन्छ । ‘पक्राउ परेकाको बयान त सकिएको छ तर अनुसन्धानका अरू थुप्रै कामहरू बाँकी छन् । त्यसैले बुधवारसम्म अभियोग पत्र दर्ता हुने सम्भावना शून्यजस्तै छ,’ सीआईबी स्रोतले भन्यो । सीआईबीले अनुसन्धान सकेर प्रतिवेदन बुझाएपछि सरकारी वकिलले त्यसलाई अध्ययन गरेर अभियोग पत्र तयार गरी अदालतमा दर्ता गर्ने कानुनी व्यवस्था छ । ‘अनुसन्धान चलिरहेका बेला अन्यको संलग्नताका विषयमा पनि हामी हेरिरहेका छौँ । विभिन्न ठाउँबाट कागजपत्रहरू आउन बाँकी छ । यस्तो अवस्थामा अदालतले सीमा तोक्नु भनेको बाहिर राखेरै अनुसन्धान गर भन्नु हो,’ प्रहरी उच्च स्रोत भन्छ । बाँसबारी जुत्ता कारखानाको १० रोपनी जग्गा चौधरी समूहले निजी बनाएको आरोपपछि सीआईबीले अनुसन्धान सुरु गरेको थियो ।
