नागरिक उन्मुक्ति पार्टीको पहिलो महाधिवेशन टीकापुरमा
नागरिक उन्मुक्ति पार्टी (नाउपा) को पहिलो महाधिवेशन कैलालीको टीकापुरमा बिहीबारबाट सुरू हुँदै छ । तीन दिनसम्म चल्ने महाधिवेशनले नयाँ नेतृत्व चयन गर्ने छ । महाधिवेशनको उद्घाटन प्रधानमन्त्री पुष्पकमल दाहाल ‘प्रचण्ड’ले गर्ने नाउपाले बताएको थियो । तर, प्रधानमन्त्री प्रचण्ड आउने सम्भावना कम रहेको ना नाउपाका नेता लक्ष्मणकिशोर चौधरीले जानकारी दिए । मौसमको खराबीको कारण प्रधानमन्त्री प्रचण्ड आउने सम्भावना कम रहेको उनले बताए । उद्घाटन सत्रमा सहभागी हुन नेकपा (एकीकृत समाजवादी) पार्टीका अध्यक्ष माधवकुमार नेपाल टीकापुर पुगिसकेका छन् । नेपाल समाजवादी पार्टी (नेकपा) का अध्यक्ष बाबुराम भट्टराई लगायतका नेताहरू पनि अधिवेशनका लागि आउने तयारी रहेको चौधरीले बताए ।
पार्टीका संरक्षक रेशमलाल चौधरीले पहिलो महाधिवेशनलाई ऐतिहासिक बनाउने बताएका छन् । महाधिवेशनका लागि ५२ वटा जिल्लाबाट आठ हजार प्रतिनिधि सहभागी हुने उनले बताए । नेता लक्ष्मणकिशोर चौधरीका अनुसार महाधिवेशनले ३९ जना पदाधिकारीसहित दुई सय ४६ जनाको केन्द्रीय समिति चयन गर्नेछ । महाधिवेशनबाट निर्वाचित हुनेभन्दा बढी संख्यामा केन्द्रीय सदस्य मनोनीत गर्ने तयारी रहेको नागरिक उन्मुक्ती पार्टीका नेताहरूले बताएका छन् । अध्यक्ष र पदाधिकारीसहित दुई सय ४६ जनाको केन्द्रीय समिति महाधिवेशनले चयन गर्ने र दुई सय ५५ जना केन्द्रीय सदस्य मनोनीत गरिने बताइएको छ ।
