प्रकाश ज्वालालाई मन्त्रीबाट हटाउने प्रधानमन्त्री प्रचण्डको तयारी

 

 

बालकुमारी घटनापछि प्रधानमन्त्री पुष्पकमल दाहाल ‘प्रचण्ड’ले भौतिक योजना तथा यातायातमन्त्री प्रकाश ज्वालालाई मन्त्रीबाट हटाउने तयारी सुरु गरेका छन् । यसका लागि उनले सरकारबाट फिर्ता बोलाउन उनको दल नेकपा (एकीकृत समाजवादी)लाई आग्रह समेत गरेका छन् । प्रधानमन्त्री प्रचण्डले नेकपा एसका अध्यक्ष माधवकुमार नेपाललाई टेलिफोन गरी मन्त्री ज्वालालाई सरकारबाट फिर्ता बोलाइदिन आग्रह गरेको स्रोतको दाबी छ । ‘भौतिक योजना तथा यातायातमन्त्री प्रकाश ज्वाला विवादमा पर्नुभयो, उहाँलाई सरकारबाट फिर्ता बोलाउँदा राम्रो होला,’ प्रधानमन्त्री दाहाललाई उद्धृत गर्दै नेपालनिकट स्रोतले भन्यो । रोजगारीका लागि कोरिया जान भाषा परीक्षा दिन पाउनुपर्ने माग राखेर ललितपुरको बालकुमारीस्थित इपिएस कार्यालय क्षेत्रआसपास शुक्रबार गरिएको प्रदर्शनमा प्रहरीले गोली चलाउँदा दुई युवकको ज्यान गएको थियो ।

यसमा भौतिक योजना तथा यातायातमन्त्री ज्वाला पनि जिम्मेवार देखिएपछि प्रधानमन्त्रीले उनलाई सरकारबाट फिर्ता बोलाउन अध्यक्ष नेपालसमक्ष आग्रह गरेका हुन् । मन्त्री ज्वाला शुक्रबार झन्डावाला गाडीसहित विरोध प्रदर्शन भइरहेको क्षेत्र बालकुमारी हुँदै कोटेश्वर जाने क्रममा प्रदर्शनकारी आक्रोशित भएका थिए । आक्रोशित प्रदर्शनकारीले मन्त्री ज्वालाको गाडीमा आगजनीसमेत गरेका थिए ।  प्रदर्शनमा प्रहरीले गोली चलाएको थियो । प्रहरीले गोली चलाउँदा दुई युवकको ज्यान गएको थियो । बालकुमारी घटनापछि मन्त्री ज्वाला र गृहमन्त्री नारायणकाजी श्रेष्ठको राजीनामा माग गर्दै पछिल्लो दिनहरुमा दिनहुँ विरोध प्रदर्शन भइरहेको छ ।