यो सरकार आफैँ ढल्न सक्छ : अध्यक्ष ओली
नेकपा (एमाले) का अध्यक्ष केपी शर्मा ओलीले वर्तमान सरकार कुनै पनि बेला आफैँ ढल्न सक्ने बताएका छन् । ‘समृद्विका लागि संकल्प यात्रा’ का क्रममा डडेल्धुरा पुगेका अध्यक्ष ओलीले डडेल्धुरामा आयोजित आमसभामा वर्तमान सरकार गठबन्धनको छेस्काले अड्किएको भएकाले कुनै पनि बेला आफैँ ढल्न सक्ने बताएका हुन् ।
‘यो सरकार आफैं ढल्न पनि सक्छ कुनै समय । यो गठबन्धनको छेस्का अड्याएको सरकार हो,’ ओलीले भने । गठबन्धन सरकारको कुनै सिद्धान्त, नीति, योजना र कार्यक्रम नभएको टिप्पणी गरे । अर्को प्रशंगमा ओलीले कांग्रेस प्रचण्डपथको भरिया बनेको आरोपसमेत लगाए । नेपाली जनताका बीचमा द्वन्द्व मच्याउन खोज्नेहरुले सक्रिय भएर आतंककारी गतिविधि गरिरहेको ओलीले बताए ।
