एमालेमै फर्किए नेकपा एसका केन्द्रीय सदस्य गोपाल बम

नेकपा एकीकृत समाजवादीका केन्द्रीय सदस्य तथा पूर्वसांसद गोपाल बम नेकपा एमालेमै फर्किनु भएको छ । एमाले अध्यक्ष केपी शर्मा ओलीको निवास बालकोट पुगेर पूर्वसांसद बम आज एमालेमै फर्किनु भएको हो । २०७४ सालको निर्वाचनमा मुगुबाट प्रतिनिधिसभा सदस्यमा निर्वाचित हुनुभएका बम एमाले विभाजनताका माधव नेपालको पक्षमा लाग्नुभएको थियो । एमाले विभाजनमा सनाखत गर्ने माधव नेपाल पक्षका २३ सांसदमध्ये बम पनि एक हुनुहुन्थ्यो । माधव नेपालको भ्रममा परेर आफूले त्यो गल्ती गरेको बमको भनाई छ ।

नेकपा एकीकृत समाजवादी भन्ने पार्टीको औचित्य छैन भन्ने जनताले प्रष्ट पारिसके, माधव नेपाल र केही मानिसको ब्यवसाय चलाउन त्या पार्टीमा रहिरहने कुरा उचित लागेन । त्यसैले आफ्नो पुरानो घर फर्किएँ,’ प्रवेशपछि पूर्वसांस्द बमले भन्नुभयो । बमले आफूसहित कार्यकर्ता प्रवेशका लागि कर्णालीमा चाँडै अध्यक्ष ओलीको उपस्थितिमा पार्टी प्रवेश कार्यक्रम राखिने बताउनु भएको छ । बम एमालेमै फर्किएसँगै मुगुमा नेकपा एकीकृत समाजवादीको अवस्था दयनीय बनेको छ । बमको एमाले फिर्ताले माधव नेपाललाई ठूलो झडकासमेत लागेको छ ।