भूकम्प प्रभावित बस्तीमा अस्थायी आवास निर्माण गर्न १ हजार स्वयंसेवक परिचालन गर्दै एमाले

 

 

नेकपा एमालेले जाजरकोट र रुकुमपश्चिमका भूकम्पपीडितलाई अस्थायी आवास निर्माणका लागि स्वयंसेवक परिचालन गर्ने भएको छ । बुधवार बसेको एमाले सचिवालयको बैठकले मंसिर १ गतेदेखि अस्थायी घर टहरा निर्माणका लागि प्रभावित क्षेत्रमा १ हजार स्वयंसेवक परिचालन गर्ने निर्णय गरेको उपमहासचिव प्रदीप ज्ञवालीले जानकारी दिनुभयो ।

गत शुक्रबार जाजरकोटको रामीडाँडालाई केन्द्रबिन्दु बनाएर ६.४ म्याग्निच्युडको भूकम्प जाँदा ३५ हजारभन्दा बढी घरमा क्षति पुगेको छ, जसमा सबैभन्दा बढी क्षति जाजरकोट र पश्चिम रुकुममा पुगेको छ । सो क्षेत्रमा अस्थायी आवास निर्माणका लागि स्वयंसेवक परिचालन गर्ने एमालेले निर्णय गरेको हो । एमालेले २०७२ सालमा ५० हजार स्वयंसेवक परिचालन गरेर तीन महिनामा २७ हजार अस्थायी घर–टहरा बनाएको थियो । ‘भूकम्पपीडितको अस्थायी अवास निर्माणका लागि पार्टीबाट १ हजार स्वयंसेवक खटाउने निर्णय भएको छ । उपमहासचिव ज्ञवालीका अनुसार स्वयंसेवकहरु ५ हजार कार्य दिनभन्दा बढी खट्ने छन भने १ करोड रुपैयाँभन्दा बढीको श्रम परिचालन हुनेछ । यस क्रममा हजारौं घर–टहरा बनाउने ज्ञवालीले बताउनु भयो । ज्ञवालीका अनुसार आवास निर्माणको कामको संयोजन एमाले कर्णाली प्रदेश कमिटीले गर्नेछ ।

एमालेले भूकम्पपीडितहरूका लागि संकलन भएको राहत प्रभावकारी रूपमा वितरण गर्नसमेत माग गरेको छ । ‘चिसोमा भूकम्पपीडितहरू भोकभोकै सुत्नु परेको छ, विपद् पर्यटनका नाममा घुम्न जाने र सेल्फी खिच्ने काम भएको छ । राहत वितरण पारदर्शी, जिम्मेवार र प्रभावकारी रूपमा गर्न सरकारको ध्यानाकर्षण गराउँछौं,’ बैठकको निश्कर्ष सुनाउँदै उपमहासचिव ज्ञवालीले भन्नुभयो । एमालेले राहत वितरणमा पक्षपात भएको भन्दै त्यस्तो नगर्न पनि सरकारको गम्भीर ध्यानाकर्षण गराएको छ ।