पूर्वमन्त्री कुशवाहसहित बाराका पाँच दर्जन नेता–कार्यकर्ता एमालेमा प्रवेश
पूर्वमन्त्री शिवचन्द्र कुशवाहसहित पाँच दर्जन नेता तथा कार्यकर्ता नेकपा एमालेमा प्रवेश गरेका छन् । गत वैशाख १० गतेको उपनिर्वाचनमा माओवादी केन्द्र छाडेर सीके राउत नेतृत्वको जनमत पार्टीबाट बारा–२ मा उम्मेदवार बनेका कुशवाह एमाले प्रवेश गरेका छन् । यसअघि उनी जनमत पार्टी छोडेर स्वतन्त्र रहँदै आएका थिए ।
एमाले केन्द्रीय कार्यालय च्यासलमा आज आयोजित एक कार्यक्रमबीच उनीसहित बाराका ५४ जना नेता तथा कार्यकर्ता एमालेमा प्रवेश गरेका हुन् । कुशवाहसहितलाई एमालेका अध्यक्ष केपी शर्मा ओलसहित वरिष्ठ उपाध्यक्ष ईश्वर पोखरेल, महासचिव शंकर पोखरेल, मधेश प्रदेश इन्चार्ज योगेश भट्टराईलगायत नेताहरूले स्वागत गरे । कुशवाह २०६४ सालमा बारा–२ बाट संविधान सभा सदस्य निर्वाचित भएका थिए भने माओवादी केन्द्रको पोलिटब्यूरो सदस्य पनि रहेका थिए ।
