माओवादी कमजोर भयो भने हामीलाई बाँकी राख्दैनन् : प्रचण्ड
प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले यस पटक आफूले सरकारमा बसेर नयाँ जनयुद्धको सुरुआत गरेको बताएका छन् । पार्टीको जनतासँग माओवादी अभियानलाई सम्बोधन गर्दै अध्यक्ष प्रचण्डले नयाँ क्रान्ति नथाल्ने हो भने परिवर्तन उल्टिएर देश दुर्घटनामा पर्ने खतरा देखिएकाले आफूले प्रधानमन्त्रीको रूपमा माओवादीलाई मजबुत पार्न खोजेको बताए । उनले माओवादीको शक्ति कमजोर हुनासाथ प्रतिक्रियावादीले के के गर्छन् भन्ने देखिएकाले आफू शान्ति प्रक्रियालाई टुंगोमा पुर्याउनका लागि अग्रसर भएको बताए । उनले आफूमाथि मात्रै जनयुद्धकालीन ३६ वटा मुद्दा रहेको भन्दै माओवादी कमजोर हुनासाथ मुद्दाहरू थपिने दाबी गरे । प्रधानमन्त्रीले भने( माओवादी कमजोर हुने बित्तिकै प्रतिक्रियावादीहरुले के के गर्छन् तपाईँहरूले देखिरहनुभएको छ । हामीमाथि सयौँ मुद्दाहरू छन् । ममाथि मात्रै ३६ वटा मुद्दा छन्,हिजो आज मात्र २ वटा मुद्दा हालेका छन्,हामी फेरि एकजुट भयौँ भनेपछि अहिले ती थाती छन् ।
प्रचण्डले माओवादी कार्यकर्ताहरूको शीर उँचो राख्न आफूले यस पटक सरकारमा बसेर नयाँ खालको जनयुद्ध थालेका बताए । उनले अब तीन महिनापछि माओवादी नयाँ ढंगले बलियो भएर आउने आशा समेत व्यक्त गरे । उनले भने( माओवादी हौँ भन्न पनि कता कथा अप्ठेरो मान्ने अनि हाम्रा दुश्मन परिवर्तनका विरोधीहरूले हुंकार गर्ने अवस्थाको अन्त गर्न नयाँ जनयुद्धको सुरुआत गरेको छु । यो जनयुद्धमा हिंसा हुँदैन,हतियारको प्रयोग हुँदैन तर यो जनयुद्ध नै हो । यसको सुरुआत लिडरशीपबाटै हुनुपर्यो भनेर गरिएको छ । यसले लाखौँ करोडौँ जनताको मत जित्ने पनि छ । प्रचण्डले यो अभियानका क्रममा विरोधी जनताको घरमा समेत गएर समाजवादतिर मुलुकलाई लैजानेबारे जानकारी गराउन निर्देशन दिए ।
