एमालेसँग कोही एक्लै लड्न सक्दैन : केपी ओली
नेपाल कम्युनिष्ट पार्टी एमालेका अध्यक्ष केपी शर्मा ओलीले नेकपा एमाले देशको एकमात्र बलियो शक्ति भएको बताएका छन् । नेकपा एमाले ललितपुर जिल्ला कमिटीको पूर्ण बैठकलाई सोमबार सम्बोधन गर्दै अध्यक्ष ओलीले एमाले वायुपुत्र हनुमानजस्तै भएको र यो पार्टीसँग कसैले एक्लै लड्न सक्ने हैसियत नराख्ने बताएका हुन् । अध्यक्ष ओलीले आगामी २०८४ सालको निर्वाचनमा देशका सबै वडाबाट बहुमत ल्याउने अभियानसहित ‘मिसन–८४, मिसन ५१ प्रतिशत’ अभियान चलाउन जिल्ला कमिटी र कार्यकर्ता पङ्क्तिलाई निर्देशन दिएका छन् ।
‘अर्को निर्वाचनमा एमाले बाहेक कुनै दलका उम्मेदवारलाई अबिरमाला लाउने अधिकार छैन । त्यसका लागि पार्टीका सबै कार्यकर्ता सक्रिय र सबै कमिटीहरू चुस्तदुरुस्त हुनुपर्छ,’ अध्यक्ष ओलीले भने । पार्टीको कार्यकर्ता हुँ भन्ने तर पार्टीका नीति र कार्यक्रमको प्रचार नगर्ने, जनतामा नपुर्याउने व्यक्ति एमालेको कार्यकर्ता हुन नसक्ने भन्दै अध्यक्ष ओलीले आफूभित्र रहेका कमजोरीहरू आफैँले सच्याउनुपर्ने बताए ।
गत निर्वाचनमा कुनै कार्यक्रम र योजना नभएका र राजनीतिक अनुभव र योगदान नभएकाहरूले समेत जितेको प्रसङ्ग जोड्दै अध्यक्ष ओलीले भने, ‘हामीसँग यत्रो आन्दोलन, योजना, देश विकासको लक्ष्य र जेलनेलसम्मको इतिहास छ तर अहिले कुनै योजना नभएका उम्मेदबारलाई जिताउनु भनेको जनतालाई हामीले बुझाउने काममा कमी भएर हो ।’ एमालेका कार्यकर्ताहरू विकासका अभियन्ता बन्दै उद्योग सञ्चालन गर्न र प्रत्यक्ष उत्पादनमा जोडिन सुझाउँदै उनले भने, ‘हामीले अरुलाई सिकाउने मात्र होइन, आफैँले उत्पादनको अभियान सुरु गर्नुपर्छ । गाह्रो कुरो केही छैन,अहिले साग रोप्यो भने एक डेढ महिनामा पैसा फलिहाल्छ ।
