समाजवादी पसल धेरै दिन टिक्दैन : गोकुल बास्कोटा
नेकपा (एमाले)का पोलिटब्युरो सदस्य तथा सिन्धुपाल्चोक इन्चार्ज गोकुल बास्कोटाले समाजवादी पार्टी र मोर्चा दुवैको भविष्य नरहेको बताएका छन् । मंगलबार एमाले सिन्धुपाल्चोकको एघारौँ बैठकलाई सम्बोधन गर्दै नेता बास्कोटाले एमालेको उर्बर जिल्ला सिन्धुपाल्चोकमा अरु पार्टी कसरी हावी हुन खोजे भन्दै समीक्षा गर्न जरुरी रहेको बताए । एमालेको मनै देखि एकताबद्ध प्रयास भएमा सिन्धुपाल्चोकमा यसको साख फर्कने नेता बास्कोटाको बुझाई रहेको छ ।
‘पार्टीमा लामो र धेरै रगत पसिना बगाएर योगदान गर्नुभएका साथिहरु अहिले अर्को पार्टीतिर लाग्नुभएको छ । त्यो समाजवादी पसल धेरै दिन टिक्नेवाला छैन्, एमालेमा फर्कनुस्, विना विभेद पार्टीले उपयुक्त जिम्मेवारि दिनेछ ।’ नेता बास्कोटाले भने । एमालेबाट बाहिरिएका वा विभिन्न पार्टीमा लागेका र एमालेमा नै भविष्य देखेका आम नेता कार्यकर्तालाई पार्टीमा गोलवद्ध भई सदस्यता नविकरण गर्न समेत नेता बास्कोटाले सुझाएका छन् ।
एमाले सिन्धुपाल्चोकको इन्चार्जको जिम्मेवमरी सम्हाल्न बास्कोटा सोमबार नै सिन्धुपाल्चोक आएका थिए । प्रखर र प्रष्ट वक्ताको रुपमा परिचित नेता बास्कोटालाई इन्चार्जको रुपमा पाउँदा एमाले सिन्धुपाल्चोकका नेता कार्यकर्ता उत्साहीत देखिएका छन् । एमाले सिन्धुपाल्चोकका अध्यक्ष कमल नेपाल, सचिव रामचन्द्र बस्नेतलगायतले बास्कोटालाई सिन्धुपाल्चोकमा स्वागत तथा यहाँको वस्तुगत जानकारी गराएका थिए । बैठकमा एमाले बागमती प्रदेश कमिटी अध्यक्ष केशव पाण्डे, स्थायी कमिटी सदस्य गुरु वरालले लगाएतका नेताहरु सहभागी थिए ।
