रामबहादुर थापाका छोरा प्रतीक थापाविरुद्ध पनि पक्राउ पुर्जी जारी

 

 

नक्कली शरणार्थी भुटानी काण्डमा पूर्वगृहमन्त्री तथा एमाले उपाध्यक्ष रामबहादुर थापाका छोरा प्रतीक थापाविरुद्ध पनि पक्राउ पुर्जी जारी भएको छ । जिल्ला अदालत, काठमाडौंले प्रतीकलाई पक्राउ गर्न प्रहरीलाई पुर्जी दिएको होे । सर्वसाधारण नेपालीलाई नक्कली भुटानी शरणार्थी बनाएर अमेरिका लैजान रचिएको प्रकरणमा उनी पनि संलग्न भएको तथ्य फेला परेपछि प्रहरीले पक्रन लागेको हो । बादल गृहमन्त्री भएको बेलामा छोराले गिरोहलाई सहयोग पुर्याएको देखिएको बताइएको छ । प्रहरी हिरासतमा रहेका पूर्वगृहमन्त्री थापाका सुरक्षा सल्लाहकार इन्द्रजित राईको बयानका आधारमा प्रतीक पनि अनुसन्धानमा तानिएका हुन् ।

तर, एमाले सचिव तथा सांसद टोपबहादुर रायमाझी फरार रहेदेखि नै प्रतीक पनि बेपत्ता भएको बताइएको छ । यो काण्डमा टोपबहादुर रायमाझीका छोरा, पूर्वगृहमन्त्री बालकृष्ण खाँण, तत्कालीन गृहसचिव टेकनारायण पाण्डे लगायत १२ जना पक्राउ परिसकेका छन् । पूर्वप्रधानमन्त्री तथा काँग्रेस सभापति शेरबहादुर देउवाकी पत्नी तथा सांसद आरजू राणा र खाँणकी श्रीमती तथा सांसद मञ्जु खाँण विरुद्ध पनि यो काण्डमा संलग्न भएको आरोप लागेको छ ।