सुमेरु सहकारीले माफी माग्यो, सम्पत्ति बेचेर भए पनि रकम फर्काउने
ललितपुरको पुल्चोकमा मुख्य कार्यालय रहेको सुमेरु बचत तथा ऋण सहकारी संस्थाले सुमेरु ग्रुपको सम्पत्ति बेचेर बचतकर्ताको बचत फिर्ता गर्ने प्रतिबद्धता व्यक्त गरेको छ । सहकारीले नियम अनुसार साँवा ब्याज भुक्तान गर्न नसकेको भन्दै माफी मागेको छ । सुमेरुले एक विज्ञप्ति जारी गरेर बचतकर्ताको पैसा फिर्ता गर्न सम्पत्ति बेच्ने प्रतिबद्धता व्यक्त गरेको हो । सहकारीले सञ्चालकहरू नभागेको पनि दाबी गरेको छ ।
‘निक्षेपकर्ताको निक्षेप सुरक्षित गर्ने प्रयासमा लागेको बेला सञ्चालक विदेश पलायन हुने भाग्ने जस्तो गै जिम्मेवार कार्य संस्थाको सञ्चालकबाट कदापि हुने छैन यसप्रति हामी हाम्रा निक्षेपकर्तालाई विश्वास र आश्वस्त हुन हार्दिक अपिल गर्दछौँ’, सहकारीका व्यवस्थापक धनेन्द्र कटेलद्वारा जारी विज्ञप्तिमा भनिएको छ। सुमेरुले प्रदेश रजिष्ट्रारको कार्यालयमा पेश गरेको वित्तीय विवरण अनुसार ८ अर्ब बढी दायित्व र १० अर्ब सम्पत्ति रहेको छ ।
