मतदान केन्द्रमै रविमाथि गठबन्धनका कार्यकर्ताद्वारा आक्रमण
चितवन-२ स्थित नयाँकिरण कमलकुसुम माध्यमिक विद्यालयको मतदान केन्द्रमा तनाव भएको छ । मतदान निरीक्षणका लागि राष्ट्रिय स्वतन्त्र पार्टीका उम्मेदवार रवि लामिछाने मतदान केन्द्रमा पुग्ने बित्तिकै गठबन्धनका कार्यकताले रविलाई आक्रमण गर्न खोजेका थिए । उनीहरूले रविले आचारसंहिता उल्लंघन गरेर नाराबाजी सहित आएको आरोप लगाएका छन् । तर, प्रत्यक्षदर्शीकाअनुसार रवि पुग्ने वित्तिकै गठबन्धनका कार्यकर्ताले ढुंगा लिएर रवि माथि आक्रमणको प्रयास गरेका थिए ।
रवि आफ्ना केही सहयोगीसहित बुथतर्फ जाँदा त्यहाँ रहेका समर्थकहरुले उनको पक्षमा नारा लगाएका थिए । ‘रवि दाइ हाइ हाइ’ भन्दै नाराबाजी भएपछि ‘के को हाइ हाइ ? अहिले नाराबाजी गर्न पाइन्छ ? आचारसंहिता लाग्दैन ?’ भन्दै गठबन्धनका कार्यकर्ताले आक्रमण गरेका हुन् । रवि पुग्नुअघि नेपाली काँग्रेसका उम्मेदवार जितनारायण श्रेष्ठ पनि मतदानस्थलमा पुगेका थिए । तर रवि पुग्ने बित्तिकै भने नाराबाजी गरेर आएको भन्दै गठबन्धनका कार्यकर्ताले निहुँ खोजेर आक्रमणको प्रयास गरेका हुन् ।
