माओवादी र नेकपा एस कम्युनिष्ट आन्दोलनका गद्धार हुन : पृथ्वीसुब्बा गुरुङ
नेकपा एमालेका उपमहासचिव तथा केन्द्रीय प्रचार तथा प्रकाशन बिभाग प्रमुख पृथ्वीसुब्बा गुरुङले माओवादीसँग पार्टी एकता गर्दा पार्टीभित्र धेरै विकृति र विसङ्गति देखिएको तथ्य खोल्नुभएको छ । प्रेस चौतारी नेपाल वाग्मती प्रदेश, उपत्यका प्रदेश, प्रतिष्ठान प्रदेश र एसोशियट प्रदेशले भक्तपुरमा आयोजना गरेको भेला तथा प्रशिक्षण कार्यक्रममा बोल्दै गुरुङले यस्तो तथ्य खोल्नुभएको हो । उहाँले एकतापछि माओवादी अलग भएर गएपछि बल्ल पार्टी चलायमान भएको बताउनुभयो । संगठनमा देखिएको अनुशासन र अराजकताको खोजी गर्न पार्टी तलसम्म पुग्ने ग्रासरुट अभियानमा लागेको गुरुङले प्रष्ट पार्नुभयो ।
पार्टीभित्र देखिएको समस्या पहिचानको लागि मिसन ग्रासरुट सञ्चालन गरिएको उहाँले बताउनुभयो । ‘संगठन भित्र देखिएको अनुशासनहीनता ठोस रूपमा पहिचान गर्न मिसन ग्रासरुट आयोजना गरिएको हो’, गुरुङले भन्नुभयो । जनताबाट अलगथलग भएको कम्युनिष्ट पार्टी समाप्त हुने उहाँले प्रष्ट पार्नुभयो । त्यो पाठ नेकपा माओवादीबाट सिक्नु पर्ने उहाँले बताउनुभयो । ‘कम्युनिष्टको शक्ति जनतामा छ, त्यस कारण हामी जनताको बिचमा जानु पर्यो भनेर नै मिसन गोसरुट अभियान चलाइएको हो ,’ उहाँले भन्नुभयो ।
नेकपा एमाले सही विचारकै कारण लोकप्रिय भएको गुरुङले बताउनुभयो । एमालेको विचारलाई खिया लाग्न नदिन निरन्तर अर्जाप्नु पर्नेमा उहाँले जोड दिनुभयो । यसैको लागि नियमित प्रशिक्षण, समीक्षा र छलफल गर्नु पर्ने गुरुङले बताउनुभयो ।पार्टी भित्र देखिएको दक्षिणपन्थी अवसरवाद र अराजकतावाद अन्त्य गर्नु आजको मुख्य विषय भएको उहाँले बताउनुभयो । यसको लागि पार्टी र हरेक जनवर्गीय संगठनमा सुद्धिकरण र सुदृढीकरण आवश्यक रहेको उहाँले प्रष्ट पार्नुभयो ।
एमालेलाई घेराबन्दी गर्न शत्रुसँग मिल्ने माओवादी र समाजवादी गद्दार भएको उहाँले गुरुङले बताउनुभयो । ‘माधव नेपाल र प्रचण्डको पार्टीले बोकेको विचार गैरकम्युनिष्ट विचार हो’, गुरुङले भन्नुभयो । कम्युनिष्ट पार्टीको जन्म नै स्वतन्त्र र स्वाधीनताको लागि भएको कुरा बिर्सिएर प्रचण्ड र माधव नेपाल विदेशीसँग लम्पसार पर्न पुगेको बताउनुभयो । उनीहरूले कम्युनिष्ट पार्टीको आदर्श, सिद्धान्त, नीति र विचार बिर्सिएको उहाँको भनाइ छ ।
