पूर्वाधारमा लगानी गर्न चिनियाँलाई प्रधानमन्त्रीको अनुरोध
प्रधानमन्त्री पुष्पकमल दाहाल ‘प्रचण्ड’ले नेपालको पूर्वाधारको क्षेत्रमा चीनको लगानी खोजिएको बताउनुभयो । आज बिहान नेपाल–चीन बिजनेस फोरमको बैठकमा उहाँले नेपाल एक चीन नीतिमा प्रतिबद्ध रहेको दोहोर्याउनुभयो । नेपालको विकासका लागि चिनियाँ लगानी आवश्यक भएको उहाँले बताउनुभयो । नेपाली वस्तुलाई सहज रूपमा बजार दिन उहाँले माग गर्नुभयो ।
नेपालमा लगानीको सुरक्षामा समस्या नरहेको र लगानीबाट हुने लाभांश लैजान समस्या नरहेको उहाँले बताउनुभयो । फोरमको बैठकमा भाग लिन आएका चाइना काउन्सिल फर दी प्रमोसन अफ इन्टरनेसन ट्रेड (सीसीपीआईटी)का उपाध्यक्ष झान साओनले चीनले ९८ प्रतिशत वस्तुलाई भन्साररहित बजार प्रवेश दिइएको बताउनुभयो ।
उहाँले चियालगायत वस्तुको निर्यात बढ्न सक्ने पनि बताउनुभयो । नेपालमा भएको वैदेशिक लगानीमा चीन पहिलो रहेको उहाँले उल्लेख गर्नुभयो । चीनका राजदूत छन् सोङले चीन नेपालको ठूलो विदेशी लगानी भएको देश भएको र दोस्रो व्यापार साझेदार भएको बताउनुभयो । उहाँले कोरोनापछि अब चिनियाँहरू नेपाल घुम्न आउने पनि सुनाउनुभयो ।
