राष्ट्रपतिको बिषय पहिला नै टुंगिसक्यो : राजेन्द्र लिङदेन
सत्तारुढ राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले राष्ट्रपतिको बिषयमा सत्तारुढ दलहरुबीच पहिला नै सहमति भइसकेकोले थप छलफल गर्नुपर्ने आवश्यकता नरहेको बताउनु भएको छ । सत्तारुढ दलहरूको उच्चस्तरीय राजनीतिक संयन्त्रको बैठकबाट बाहिरिने क्रममा उपप्रधान तथा उर्जामन्त्रीसमेत रहनुभएका राप्रपा अध्यक्ष लिङदेनले यस्तो बताउनु भएको हो । नेकपा एमालेका अध्यक्ष केपी शर्मा ओली नेतृत्वमा रहेको संयन्त्रको बैठक प्रधानमन्त्रीको सरकारी निवास बालुवाटारमा बसिरहेको हो । बैठकमा सरकारका अहिलेसम्मका कामका बारेमा समीक्षा भएको राप्रपा अध्यक्ष लिङ्देनले जानकारी दिनुभयो ।
बैठकमा संयन्त्रका संयोजक ओली, प्रधानमन्त्री पुष्पकमल दाहाल, राप्रपा अध्यक्ष लिङ्देन र रास्वपा सभापति रवि लामिछाने सहभागी हुनुहुन्छ । ’राष्ट्रपति चुनावका बारेमा छलफल गर्नुपर्ने कुरै के छ र ? सबै पहिले नै तय भइसकेको कुरामा छलफल आवश्यक भएन नि,’ राष्ट्रपति निर्वाचनका बारेमा पनि केही छलफल भयो भन्ने प्रश्नमा लिङ्देनले भन्नुभयो । पूर्वनिर्धारित कामका कारण आफू बैठकबाट निस्किएको जानकारी दिँदै उपप्रधानमन्त्री लिङ्देनले भन्नुभयो, ’अहिलेसम्म सरकारले गरेका कामका बारेमा समीक्षा भयो । अब कसरी अगाडि बढ्ने भन्नेमा पनि छलफल भयो ।’
सत्तारुढ गठबन्धनमा राष्ट्रपति एमालेले पाउने सहमति भइसकेको छ । नेकपा माओवादी केन्द्रले भने कांग्रेसले पनि सरकारलाई बिश्वासको मत दिएको भन्दै राष्ट्रपतिमा राष्ट्रिय सहमति खोज्ने जनाएर कांग्रेससँगको सहकार्यमा जोड दिएपछि सत्ता गठबन्धनमा आशंका उब्जिएको छ । तर प्रधानमन्त्री दाहालले सत्ता गठबन्धनकै उम्मेदवारलाई कांग्रेसले पनि सहयोग गर्ने कुराका लागि राष्ट्रिय सहमति भनेको बताउनु भएको छ ।
निर्वाचन आयोगले राष्ट्रपतिको निर्वाचन फागुन २५ मा राष्ट्रपति र चैत ३ गते उपराष्ट्रपतिको निर्वाचन गर्ने निर्णय गरेको छ । लिङदेनका अनुसार पूर्वसहमति भइसकेको कारण आजको बैठकमा राष्ट्रपतिबारे छलफल गर्न आवश्यक ठानिएन ।
