सत्ता गठबन्धनको बैठक बस्दै, मन्त्रिपरिषद् विस्तारबारे छलफ हुने
मन्त्रिपरिषद् विस्तारबारे छलफल गर्न सत्ता गठबन्धनको बैठक आज बिहीबार बस्दैछ । प्रधानमन्त्री पुष्पकमल दाहाल ‘प्रचण्ड’ले संसदमा विश्वासको मत लिएसँगै मन्त्रिपरिषद् विस्तारको योजना बनाएका छन् । आज बस्ने बैठकले यसअघि नियुक्त भएका मन्त्रीको मन्त्रालय र मन्त्रिपरिषद् विस्तारका लागि मन्त्रालयको भागवण्डा टुंगो लगाउने बताइएको छ ।
बुधबार साँझ नेकपा एमाले अध्यक्ष केपी शर्मा ओलीसँग प्रधानमन्त्री प्रचण्डले मन्त्रिपरिषद् विस्तारलगायत समसामयिक विषयमा छलफल गरेका थिए । ओलीसँग भेटवार्ता गर्न प्रधानमन्त्री प्रचण्ड उनकै निवास बालकोट पुगेका थिए । एमालेसहित संसदमा प्रतिनिधित्व गर्ने सात दलको १ सय ६९ जना सांसदको समर्थनमा प्रधानमन्त्री बनेका प्रचण्डले मंगलबार संसदबाट विश्वासको मत लिएका थिए । १० पुसमा प्रधानमन्त्रीमा नियुक्त भएका प्रचण्डले ११ पुसमा शपथ लिएर कार्यभार सम्हालेका थिए ।
