सहकारी बैकको निर्वाचनमा सहमति तोडेको नेपाली काँग्रेसको आपत्ती

 

 

नेपाली काग्रेसको वित्तिय तथा सहकारी संस्था समन्वय विभागले सहकारी बैंक लिमिटेडको निर्वाचनमा सहमति तोडेको आरोप लगाएको छ । विभागले शुक्रबार विज्ञप्ति जारी गरी बैंकको निर्वाचनमा नेपाली काँग्रेसको तर्फबाट सहमतिको आधारमा निर्वाचनमा पठाइएको दुई आधिकारीक उम्मेदवारलाई षड्यन्त्रमुलक रुपमा हराएको आरोप लगाएको छ ।
विभागका संयोजक आनन्दप्रसाद ढुंगानाद्धारा जारी विज्ञप्तिमा बैंकमा रहेको चरम एकाधिकारको पर्दाफास हुने डरबाट सहकारी बैंकका देशभर संचालित शाखा कार्यालय र व्यवस्थापन पक्षसंग सम्बन्धित विभिन्न व्यक्तिहरु प्रयोग गरी आधिकारिक उम्मेदवार मध्य माधव दुलाल र गणेश बहादुर चन्दलाई रातारात हराउन पराजित गराई सहमति तोडि बैंकलाई आफ्नो पक्षमा गराउने र एकलौटी रुपमा बैक संचालन गर्ने गरी निर्वाचन सम्पन्न गरी सहमति तोडेकोमा नेपाली काँग्रेसको घोर आपती  रहेको जनाएको छ ।

समन्वय विभाग निकट राष्ट्रिय सहकारी बैंक लिमिटेडको पुस  १६ गते सम्पन्न १९ औ वार्षिक साधारण सभाबाट नयाँ संचालक समिति र लेखा तथा सुपरिक्षण समितिको निर्वाचनको लागि नेपाली काँगे्रस, नेकपा (एमाले), माओदावी केन्द्र, नेकपा समाजवादी बिच समझदारी गरी निर्वाचन गर्ने सहमति भएको थियो ।

सहकारी विभाग प्रमुख बीच पटक पटक छलफलबाट हालको वित्तिय एवं सहकारी क्षेत्रमा देखिएको असहज तथा चुनौतिपूर्ण परिस्थितलाई समाधान गर्न संयुक्त प्यानल तयार गरी संचालक समिति र लेखा तथा सुपरिवेक्ष समितिको गठन गर्ने निर्णय  भएको थियो । सो निर्णयको वर्खिलाफमा तीन दल मिलेर नेपाली काग्रेसको तर्फबाट केन्द्रीय सदस्य पदका उम्मेदवार दुलाल र लेखा तथा सुपरिवेक्षण समितिका सदस्य चन्दलाई हराएकोमा आपत्ती जनाएको छ ।
नेपाली काँग्रेसको  तर्फबाट संचालक समिति सदस्यमा दुलाल, माधवलाल देवकोटा, तारा गुरुङ्ग र शिवा थापालाई तोकिएको थियो । सो पार्टीले  लेखा तथा सुपरिवेक्षण समितिमा गणेश बहादुर चन्दलाई आधिकारिक उम्मेदवार बनाउने निर्णय गरेको थियो । तीनदलले षडयन्त्रपुर्वक ढंगले दुईजना उम्मेदवारलाई हराएको विभागको आरोप छ ।

हराएका दुई उम्मेदवारले बैंकभित्र रहेको चरम राजनीति, वेथिति, अनियमितता र एकाधिकार प्रवृत्तिको विषयमा पार्टी र विभागलाई  पटक पटक जानकारी गराईरहेका थिए । ‘यस पटक बैंकको निर्वाचनमा भएको षडयन्त्रबाट हामीलाई त्यहाँ रहेको एकाधिकारपन,एकलौटी व्यवस्थापन, चरम राजनीतिको हस्तक्षेप एवं अनिमितता रहेको विषय प्रमाणित भएको छ’–विभागका संयोजक ढुंगानाद्धारा जारी विज्ञप्तिमा उल्लेख छ  ।

सहकारी बैंकको हालको व्यवस्थापन पक्षको सुक्ष्म अध्ययन गर्दा  बैंकमा भएको एकलौटीपन, चरम राजनीति तथा वेथितिले सहकारी बैंकको व्यवसायीकतामा हस आउने निश्चित प्रायः छ । अतः देशभर संचालित सहकारी संघ संस्थाहरुले सो बैंकसँग कारोबार गर्दा अत्यन्त चनाखो र शतर्क रहनुहुन हार्दिक अपिल गर्दछु– विभाग प्रमुख ढुंगानाद्धारा जारी विज्ञप्तिमा भनिएको छ ।