वर्तमान आर्थिक अवस्थाबारे अर्थमन्त्री र गभर्नरसँग प्रधानमन्त्रीको छलफल
प्रधानमन्त्री पुष्पकमल दाहाल ‘प्रचण्ड’ ले उपप्रधान तथा अर्थमन्त्री विष्णु पौडेल र राष्ट्र बैंकका गभर्नर महाप्रसाद अधिकारीसँग छलफल गरेका छन् । बालुवाटारमा भएको भेटघाटको क्रममा अर्थतन्त्रको वर्तमान अवस्था, बैंकिङ क्षेत्रमा देखिएका समस्या र तत्काल सुधार गर्नुपर्ने विषयमा प्रधानमन्त्रीले चासो राखेको सचिवालयले जनाएको छ ।
बैंकिङ क्षेत्रमा पछिल्लो समयमा देखिएको समस्या, ब्याजदर वृद्धिलाई लिएर व्यवसायीले गरिरहेको गुनासो समाधानको उपाय खोजीबारे पनि त्रिपक्षीय भेटमा छलफल भएको छ । ब्याजदर घटाउन तथा तरलताको समस्याका बारेमा मौद्रिक नीतिमा सुधारका साथै अन्य आवश्यक पहलकदमी गर्नुपर्नेमा प्रधानमन्त्री दाहालले जोड दिएका छन् ।
छलफलका प्रधानमन्त्रीले देशको अर्थतन्त्रमा देखिएको चुनौतीका कारण जनतामा परेको असरलाई न्यूनीकरण गर्ने उपायहरुको खोजी गर्न, अनुत्पादक क्षेत्रमा ऋण प्रवाह रोक्न तथा अर्थतन्त्रको अवस्थाबारे जनतालाई सुसूचित र सचेत तुल्याउन आवश्यक रहेको बताए ।
