प्रधानमन्त्री नपाए विकल्प खोज्ने प्रचण्डको संकेत

 

 

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ सँग नेपाली कांग्रेसका नेता प्रकाशमान सिंहले भेटेका छन् ।शुक्रबार बिहान दाहाल निवास खुमलटार पुगेका सिंहले प्रचण्डसँग सरकार गठनको विषयमा छलफल गरेका छन् ।

गठबन्धन दलबीच सरकार बनाउने सहमति भएपनि नेतृत्वको विषयमा सहमति बन्न सकेको छैन । चुनावी सरकारको नेतृत्व देउवाले गरेको हुनाले प्रचण्डले अब बन्ने सरकारको नेतृत्वमा दाबी गरेका छन् । प्रचण्डलाई मनाउन नेता सिंहले ‘पावर शेयरिङ’ का आधारमा दोस्रो कार्यकाल प्रधानमन्त्री बनाउने प्रस्ताव गरेको नेता सिंहका प्रेस संयोजक युपी लामिछानेले बताए ।

‘गठबन्धनको सरकार बनाउने भएपछि पहिलो कार्यकाल देउवालाई प्रधानमन्त्री छाड्नुहोस् । दोस्रो कार्यकतालमा तपाई प्रधानमन्त्री बन्नुस्’ सिंहको भनाइ थियो । तर, सिंहको प्रस्ताव प्रचण्डले अस्वीकार गरेको स्रोतले बतायो । प्रचण्डले पहिलो कार्यकाल प्रधानमन्त्री नपाए विकल्प खोज्ने संकेत दिएको बताइएको छ । कांग्रेसले प्रधानमन्त्री नदिए प्रचण्डले एमालेसँगको संवादलाई अगाडि बढाउने तयारी गरेका छन् ।

बिहीबार पनि सरकार गठनको विषयमा माधव नेपाललाई साथ लिएर प्रचण्डले देउवासमक्ष आफूलाई प्रधानमन्त्री बन्न सहयोग गर्न आग्रह गरेका थिए । गठबन्धनमा प्रधानमन्त्रीसहित राष्ट्रपति, उपराष्ट्रपति, सभामुख, उपसभामुख, राष्ट्रियसभा अध्यक्ष, मुख्यमन्त्रीलगायका पद प्याकेजमै सहमति प्रयास जुटाउने गृहकार्य भइरहेको छ ।