६४ यताका निर्वाचनमा माओवादीको ओरालो यात्रा : विष्णु रिजाल

 

 

नेकपा एमालेको प्रचार विभागका उपप्रमुख विष्णु रिजालले नेकपा माओवादी केन्द्र हरेक निर्वाचनमा ओरालो लागिरहेको दाबी गरेका छन् । आज एक ट्वीटमार्फत उनले २०६४ यताका निर्वाचनको नतिजा केलाउँदा यस्तो तथ्य देखिएको उल्लेख गरेका हुन् ।

‘२०६४ सालयताका हरेक निर्वाचन केलाउँदा माओवादी निरन्तर ओरालो लागिरहेको छ,’ उनले लेखेका छन्,‘भर्खरै सम्पन्न स्थानीय निर्वाचनसम्म आइपुग्दा यो पार्टी १२ प्रतिशतमा सीमित भएको छ ।’ भर्खरै चितवन माओवादीका प्रभावशाली नेता एमाले प्रवेश गरेको पनि उनले उल्लेख गरेका छन् ।

रिजालको भनाई जस्ताको तस्तै

०६४ सालयताका हरेक निर्वाचन परिणामहरु केलाउँदा माओवादी निरन्तर ओरालो लागिरहेको छ । भर्खरै सम्पन्न स्थानीय निर्वाचनसम्म आइपुग्दा यो पार्टी १२ प्रतिशतमा सीमित भएको छ । हिजो मात्रै केन्द्रीय सदस्य यामबहादुर किसानलगायतका नेता–कार्यकर्ता नेकपा (एमाले) मा प्रवेश गर्नुभएको छ । हिजो जनयुद्ध लडेका शीर्षस्थ नेताहरु नै नेकपा (एमाले) को नेतृत्वमा रहनुले नेकपा (एमाले) नै कम्युनिस्ट आन्दोलनको मियो हो भन्ने देखाइरहेकै छ । कम्युनिस्ट पार्टीको साइनबोर्ड झुण्ड्याएर कांग्रेसको सेवा गर्ने, वामपन्थीका विरुद्ध दक्षिणपन्थी गठबन्धन बनाउने, कांग्रेसका सभापतिलाई आफ्नो मुख्य नेता मान्ने र एउटाविरुद्ध अर्कालाई प्रयोग गर्ने अवसरवादी नीति बोक्ने जस्ता कारणले ढिलो–चाँडो यो पार्टी इमानदार कार्यकर्ताले छाड्नुबाहेक विकल्प रहँदैन ।