एमालेले चुनाव जित्ने यस्ता छन् चार आधारहरु

 

 

देशभर स्थानीय तहको निर्वाचनको सरगर्मी बढिरहेको छ । दलहरुले आआफ्नै पार्टीको जितको दावी गरिरहेका छन् । यसै क्रममा नेकपा (एमाले)का महासचिव शंकर पोखरेलले एमालेले निर्वाचन जित्ने चार आधारहरु प्रस्तुत गरेका छन् ।

उनले अहिले पाँच दलीय गठबन्धन र एमालेबीचको प्रतिस्पर्धा रहेको उल्लेख गर्दै अब देशमा स्पष्ट दुई ध्रुव हुने पनि बताए । त्यस्तै, उनले मुलुकमा बलियो राजनीतिक शक्ति आवश्यक रहेको पनि औँल्याए । धेरै शक्ति हुँदा विचलन हुने उनको भनाइ छ । महासचिव पोखरेलले के के चार देखाए त एमालेको विजय हुने चार आधार ?

पहिलो

राष्ट्रिय स्वाधिनता, स्वभिमान र राष्ट्रियताको प्रश्न जसमा हामी खरो सावित भएका छौ । पहिलोपटक हामीले नाकाबन्दीको सामना गरेको अर्थमा जनताको प्रिय बन्यौ, यसपटक हामी स्वभाविक रुपमा नेपालको गुमेको भूमिलाई समेटेर नक्सा प्रकाशित गरेका कारण प्रिय छौँ । यो नेपाली जनमतको एउटा आधार हो ।

दोस्रो

नेपाली राजनीतिमा अधिकारको प्रश्नहरु धेरै उठे । अव विकास र समृद्धिको प्रश्न प्रधान बनेको छ भनेर नेपालको राजनीतिमा स्थापित गर्ने र त्यसको नेतृत्व गर्ने पार्टी नेकपा एमाले रह्यो भन्ने मलाई लाग्छ । र, यो जनताका बीचमा प्रिय विषय भएको छ ।

तेस्रो

सामाजिक न्यायसहितको लोककल्याणकरी राज्य व्यवस्थातर्फ हामी मनमोहनका पालादेखि जे यात्रा तय गरेका छौँ, त्यसले दक्षिण एसियामा लोककल्याणकरी राज्यतर्फको बाटोतर्फ एमाले सवैभन्दा सवल पार्टीका रुपमा स्थापित छ र राज्य व्यवस्थामा लोक कल्याणकारी विषेशताहरु अन्य मुलुकको तुलनामा नेपालमा धेरै छन्, यो एमाले विशेषता हो ।

चौथो

नेपालको राजनीति कुन बाटोमा अघि बढ्ने भन्ने सन्दर्भमा स्वभाविक रुपमा नेपालजस्तो पछौटे मुलुकमा पुजिवादतर्फ जाने कि सामाजिक न्यायसहितको समाजवादतर्फ जाने भन्ने प्रश्न बहसको विषय छ । यो बहसमा हामी सामाजिक न्याय र समानताको पक्षमा छौँ । यसर्थ जनताका बीचमा यो विषय पनि प्रिय हुन्छ । त्यसैले एमालेले चुनाव जित्ने आधार र राष्ट्रिय शक्तिका रुपमा स्थापित हुने आधार यिनै हुन् भन्ने लाग्छ ।