प्रचण्डको भित्रभित्र राष्ट्रघात, बाहिरबाहिर राष्ट्रवाद : बाबुराम भट्टराई
जनता समाजवादी पार्टी (जसपा) का संघीय परिषद् अध्यक्ष एवम् पूर्वप्रधानमन्त्री डा. बाबुराम भट्टराईले माओवादी केन्द्रका अध्यक्षले भित्रभित्र ‘राष्ट्रघात’ र बाहिरबाहिर ‘राष्ट्रवाद’को नारा अलापेको बताएका छन् । जनयुद्धकालदेखिका माओवादीकै पूर्वसहकर्मी समेत रहेका डा. भट्टराईले माओवादीहरू ‘खाओवादी’ भइसकेको समेत टिप्पणी गरेका छन् ।
अमेरिकी सहयोग मिलिनियम च्यालेञ्ज कर्पोरेशन (एमसीसी)बारे प्रचण्डले देखाएको दोहोरो भूमिकाप्रति लक्षित गर्दै डा. भट्टराईले भनेका छन्, ‘भित्रभित्र राष्ट्रघात बाहिरबाहिर राष्ट्रवाद ! माछा देखे भित्र हात, सर्प देखे बाहिर हात ! भित्र खाओवाद बाहिर माओवाद !’
त्यस्तै उनले नेपाली राजनीतिमा जबसम्म यो पाखण्डी र दुइजिभ्रे प्रवृत्तिबाट मुक्त हुॅदैन तबसम्म देश बन्दै नबन्ने ठोकुवा गर्दै उनले अगाडि लेखेका छन्, ‘नेपाली राजनीति जबसम्म यो पाखण्डी दुइजिभ्रे प्रवृत्तिबाट मुक्त हुॅदैन तबसम्म देश बन्दैबन्दैन । एमसीसी जुन ढंगले गिजोलिदैछ त्यसको परिणाम गम्भीर हुनसक्छ ! अति भए खति हुन्छ है !’
