प्रचण्ड र माधव नेपालको एम्बुसमा कांग्रेस पर्छ : महेश बस्नेत
नेकपा एमालेका प्रभावशाली नेता महेश बस्नेतले लोकरिज्याइँको बजेट ल्याएर स्थानीय तहको निर्वाचनमा जान ५ दलीय गठबन्धन अनेक छिद्र खोजिरहेको आरोप लगाएका छन् ।
एक टेलिभिजन कार्यक्रममा बोल्दै नेता बस्नेतले भने, “माधव नेपाल र प्रचण्डका केही वकिलले स्थानीय तहको निर्वाचन एक वर्ष सार्न खोजेका थिए । प्रचण्ड र माधव नेपालले प्रधानमन्त्रीलाई स्यान्डविचजस्तो बनाउन खोजेका थिए । चौतर्फी दबाब र प्रतिपक्षको चेतावनीपछि ५ दलीय गठबन्धन जेठभित्र स्थानीय तहको निर्वाचनमा जान तयार भयो । तर अझै पनि १५ जेठमा लोकप्रिय बजेट ल्याएर चुनावमा जान अनेक छिद्र खोज्दै छ ।”
उनले स्थानीय तहको निर्वाचनमा एमाले एक्लै प्रतिस्पर्धा गर्न तयार भएको पनि बताए । “गठबन्धनले स्थिरता दिँदैन भन्ने त दुई तिहाइ बहुमतको केपी ओलीको सरकार ४० महिनामै ढलेको देखिइहाल्यो । अब माधव नेपाल र प्रचण्डले गठबन्धन गर्ने होइन, सीधै कांग्रेस प्रवेश गरे हुन्छ । त्यसो भएमा डेमोक्रेटहरु कांग्रेससँग जान्छन्, कम्युनिस्टहरु एमालेसँग आउँछन्,” उनले थपे, “माधव नेपाल र प्रचण्डले कांग्रेसको बुई चढेर एमालेलाई धम्काइरहेका छन् । उनीहरु बाटो भुलेका यात्री हुन् । यो त स्याल र फ्याउराले हात्ती चढेर सिंहलाई धम्काएजस्तो हो ।”
स्थानीय तहको निर्वाचनमा एमालेले ६० प्रतिशत तह जित्ने उनले दाबी गरे । उनले भने, “कतिपयलाई लागेको होला, कतिपय नेताहरु बाहिरिएकाले एमालेले हार्छ । त्यो त पुराना पात झरेपछि वसन्त ऋतुमा नयाँ पालुवा पलाउँछ । अबको प्रतिस्पर्धा भनेको एमाले र कांग्रेसकै हो । गत स्थानीय तह निर्वाचनमा एमालेले २९७, कांग्रेसले १७०, माओवादी १४६ तह जितेका थिए । अब माओवादी डाउन हुन्छ । त्यसको लाभ एमालेलाई हुन्छ । माधव नेपालको च्याँखे थाप्ने पार्टी हो । एमाले एक्लै चुनाव जान्छ । अप्राकृतिक गठबन्धन घातक हुन्छ । प्रचण्ड र माधव नेपालको एम्बुसमा कांग्रेस किन पर्छ र ?”
एमाले नेता बस्नेतले राष्ट्रपति विद्यादेवी भण्डारीलाई महाभियोग लगाएर हटाउने सपना नदेख्न पनि चेतावनी दिए । उनले भने, “राष्ट्रपति भनेको संविधानको संरक्षक हो । देशको अभिभावक हो । उहाँको टिपोटबारे गलत ढंगको प्रचार गरिएको छ । माधव नेपाल कमरेडले राष्ट्रपतिलाई महाभियोग लगाएर हटाउने कुरा सपनामा दूध र भात खाएजस्तै कुरा हो । प्रधानमन्त्रीसँग छलफलका निम्ति ल्याएको टिपोटलाई दबाब भन्न मिल्छ ? गठबन्धनलाई मनको बाघले पटक पटक खाएको छ ।”
संघीय चुनावमा प्रचण्डलाई जिताउने ठेक्का एमालेले नलिने पनि उनले बताए । बस्नेतले भने, “संघीय चुनावमा प्रचण्डलाई सिरहामा जस्तै जिताउनुपर्ने स्थिति आउन सक्छ । तर एमालेले त्यसको ठेक्का लिँदैन । प्रचण्ड र माधव नेपालसँग एमालेको चारपाँच वर्षसम्म सहकार्य हुँदैन । ती अस्थिर शक्तिलाई कांग्रेसले बोक्न सक्छ ।”
जनताकाृ मुच्र्छित सपनालाई ब्युँझाएकाले अबको संघीय निर्वाचनपछि केपी ओली नै प्रधानमन्त्री हुने उनको ठोकुवा छ ।
