देशैभर एमाले प्रवेशको लहर, कांग्रेस–माओवादीमा ठुलो पहिरो

 

 

प्रमुख प्रतिपक्ष दल नेकपा (एमाले) ले संगठन बिस्तारको आक्रामक योजना अघि बढाएसँगै सत्तारुढ दलका नेता–कार्यकर्ता एमाले प्रवेश गर्ने लहर चलेको छ । चितवनमा सम्पन्न दशौं राष्ट्रिय महाधिवेशनपछि मंसिर अन्तिम साता बसेको केन्द्रीय कमिटी बैठकले देशभर संगठन बिस्तार र पार्टी प्रवेश अभियान चलाउने निर्णय गरेपछि कांग्रेस, माओवादी केन्द्र, मधेसवादी दलका प्रभावशाली नेता–कार्यकर्ताहरु एमाले प्रवेश गरेका हुन । पछिल्लो समय एमालेबाट बाहिरिएका माधव नेपाल समुहका नेताहरुसमेत धमाधम एमाले फर्कन थालेका छन ।

यसबीचमा देशैभर सत्तारुढ गठबन्धन त्यागेर एमाले प्रवेशको क्रम ह्वात्तै बढेको छ । समृद्ध नेपाल निर्माण गर्ने एमाले अध्यक्ष केपी शर्मा ओलीको नीति र नेतृत्वलाई साथ दिई आगामी निर्वाचनमा एक्लै बहुमत ल्याउने अभियानलाई साथ दिने घोषणासहित एमाले प्रवेशको लहर चलेको हो । यसबीचमा कपिलबस्तु, दाङ, बाँके, गुल्मी, दोलखा, सिन्धुपाल्चोक, काभ्रे, चितवन, मकवानपुर, प्यूठान, हुम्लाका माओवादीका प्रभावशाली नेताहरु एमालेमा प्रवेश गरेका छन भने माधव नेपाल नेतृत्वको पार्टीको केन्द्रीय सदस्य नै एमाले फर्किएका छन ।

पछिल्लो पटक बुधवार मात्रै २०६४ सालको संविधानसभा निर्वाचनमा हुम्लाबाट निर्वाचित सभासद रहेका माओवादीका प्रभावशाली नेता छिमी दोर्ची लामा सिंगो टीमसहित एमाले प्रवेश गर्नुभएको छ । उहाँहरुलाई अध्यक्ष ओलीले पार्टीमा स्वागत गर्नुभएको छ । प्रवेश गर्नेमा माओवादीका कर्णाली प्रदेश कमिटीका छ जना सदस्य, जिल्ला कमिटीका ३७ जना सदस्य, जनसंगठनका ४ जना केन्द्रीय सदस्य समेत रहेका छन । यस्तै गुल्मीमा पनि माओवादीका निकै प्रभावशाली नेताले एमाले रोजेका हुन । गुल्मीको छत्रकोट गाउँपालिकामा नेकपा माओवादी केन्द्रबाट गाउँपालिकाका उम्मेद्वारसहित ७० प्रतिशत भन्दा बढी कार्यकर्ता एमालेमा समाहित भएका हुन ।

छत्रकोट गाउँपालिकाका ०७४ सालका गाउँपालिका प्रमुखका उम्मेदवार रामप्रसाद पाण्डे, गाउँपालिका सचिव सरोज पाण्डे, कोषाध्यक्ष इन्दिरा पाण्डेसहित नेकपा माओवादीबाट प्रभावशाली नेताहरुलाई एमाले उपसचिव प्रदीप ज्ञवालीले पार्टीमा स्वागत गर्नुभएको छ । सो गाउँपालिकामा कार्यक्रममा छत्रकोटको खज्र्याङ्ग र दौंघाबाट नेपाली नेपाली कांग्रेसबाट पनि केही प्रभावशालाी नेतासहित सयौं कार्यकर्ता एमालेका प्रवेश गरेका छन ।

नवप्रवेसी नेता–कार्यकर्ताहरुलाई नेकपा एमाले उपमहासचिव प्रदीपकुमार ज्ञवालीले पार्टीमा स्वागत गर्नुभयो । एमाले प्रवेश गरेपछि प्रभावशाली नेता रामप्रसाद पाण्डे र सरोज पाण्डेले नेकपा एमालेले अघि बढाएको समृद्धिको अभियान र नेपाली कम्युनिष्ट आन्दोलनलाई थप इटा थप्न प्रवेश गरेको बताउनु भयो । यस्तै मकवानपुरका नेकपा माओवादी केन्द्रका चर्चित नेता बलराम वल पनि एमाले गर्नुभएको छ । नेता बलसहित मकवानपुरका माओवादी नेता कार्यकर्ताहरु एमाले प्रवेश गर्नुभएको हो ।

यसअघि नै पुस ६ गते कपिलबस्तुका चर्चित नेता मंगलप्रसाद गुप्ता आफ्ना समुहसहित नेकपा (एमाले) मा प्रवेश गर्नुभएको छ । कपिलवस्तुको बहादुगञ्जमा आयोजित पार्टी प्रवेश कार्यक्रममा मंगलप्रसाद गुप्ताको नेतृत्वमा ६ हजारभन्दा बढी कार्यकर्ता र समर्थकहरू नेकपा एमालेमा प्रवेश गर्नुभएको हो । गुप्तासहितका नवप्रवेसीहरूलाई एमाले अध्यक्ष ओलीले पार्टीमा स्वागत गर्नुभएको थियो । यस्तै पूर्वमन्त्री एवं नेकपा एकीकृत समाजवादीका पोलिटव्यूरो सदस्य यदुवंश झा सो पार्टी परित्याग गरी एमालेमै फर्कनु भएको छ ।

प्रदेश नम्बर दुईका प्रभावशाली नेताका रुपमा चिनिने झाले नेकपा (एस) परित्याग गरी एमाले रोज्नुभएको हो । उहाँलाई स्थायी कमिटी सदस्य प्रभु साह,केन्द्रिय सदस्य सन्जिभ कुमार झाको रोहवरमा एमाले अध्यक्ष ओलीले खादा लगाएर एमालेमा स्वागत गर्नुभएको हो ।

यस्तै माओवादी केन्द्रको महाधिवेशनमा सहभागी हुन काठमाडौं आउनुभएका बारा जिल्लाका इन्चार्ज कुमार मोक्तान ठुलो संख्यामा कार्यकर्तासहित एमाले प्रवेश गर्नुभएको छ ।

यस्तै पर्साको जगरनाथपुर गाउँपालिका अध्यक्ष जालिम मियाँसहित सत्तारुढ कांग्रेस, माओवादी र मधेसवादी दलका ५ हजार भन्दा बढी नेता–कार्यकर्ता एमाले पवेश गरेका छन । जगरनाथपुरमा पुस ८ गते आयोजित बिशाल सभामा एमाले अध्यक्ष ओलीले गाउँपालिकाका निर्वाचित अध्यक्ष मियाँसहित सो संख्याका नेता कार्यकर्तालाई पार्टीमा स्वागत गर्नुभएको थियो ।

यसैगरी कर्णाली प्रदेश सरकारका पूर्वभूमि व्यवस्था कृषि तथा सहकारी मन्त्री कुर्मराज शाहीका प्रमुख स्वकीय सचिव प्रेमबहादुर बुढा एमालेमा प्रवेश गर्नुभएको छ । नेकपा एकीकृत समाजवादी पार्टी कालिकोटका सचिवालय सदस्य समेत रहनुभएका बुढाले एकीकृत समाजवादी पार्टीमा लागेर भविश्य बर्वाद हुने भन्दै एमालेमै फर्किएको बताउनु भयो । बुढालाई नेपाल एमाले कर्णाली प्रदेश इन्चार्ज यमलाल कँडेलले एमाले स्वागत गर्नुभएको थियो ।