सौर्य एयरलाइन्सका स्टेसन म्यानेजर पौडेल पनि पक्राउ
त्रिभुवन अन्तर्राष्ट्रिय विमानस्थल ५० लाख रुपैयाँ बरामद प्रकरणमा सौर्य एयरलाइन्सका स्टेसन म्यानेजर पनि पक्राउ परेका छन् । आइतबार एयरलाइन्सको विराटनगर विमानस्थलका स्टेसन म्यानेजर प्रकाश पौडेललाई प्रहरीले पक्राउ गरेको हो ।
उक्त रकम सहित एयरलाइन्सकी एक महिला कर्मचारी काठमाडौं सिनामंगल बस्ने मोरङ विराटनगर महानगरपालिका-४ घर भएकी ३३ वर्षीया रेशा शाक्य पोखरेल शनिबार बिहान पक्राउ परेकी थिइन् । काठमाडौं कार्यालयमा एसिस्टेन्ट पदमा कार्यरत ति महिलालाई प्रहरीले विमानस्थलको आन्तरिक टर्मिनलतर्फको कन्वेयरबेल्ट भएको स्थानबाट आज विहान पक्राउ गरेको हो ।
सौर्य एयरलाइन्समार्फत शनिबार विराटनगरबाट काठमाडौं पठाइएको उक्त रकम लिन महिला कर्मचारी आफै पुगेकी थिइन् । प्रहरीका अनुसार १ हजार दरका ४ हजार ९ सय ५० वटा र ५ सय दरका एक हजार वटा नोटसहित महिला कर्मचारीलाई पक्राउ गरिएको हो । रकमको स्रोत खुल्न नसकेको प्रहरीले जनाइएको छ ।
