देउवा-पौडेल आ-आफ्नै प्यानल बनाउने तयारी
पार्टीको केन्द्रीय सभापतिमा पुनः उम्मेदवारी दिने तयारी गरिरहनुभएका प्रधानमन्त्री एवं नेपाली कांग्रेसका सभापति शेरबहादुर देउवाले महाधिवेशनको तयारीका लागि छलफल गर्न आफ्नो समूहका नेताहरुको बैठक बोलाउनुभएको छ । आज बिहान आफ्नो निजी निवास बूढानीलकण्ठमा बोलाइएको बैठकमा महाधिवेशनको तयारीका अलावा महाधिवेशनमा आफ्नो समूहबाट खडा गर्ने पदाधिकारीहरुको उम्मेदवारी सम्बन्धमा छलफल गर्ने सभापति देउवाको तयारी रहेको बताइएको छ ।
सो पार्टीका नेता एवम् देउवाका विश्वासप्राप्त रमेश लेखकका अनुसार पार्टीको आसन्न १४औँ महाधिवेशन सम्बन्धमा छलफल गर्न सभापतिले बैठक बोलाउनुभएको हो । यसअघि नै सभापतिमा दोहोरिने तयारी देउवाले गरिसक्नुभएको सन्दर्भमा आजको बैठकमा अन्य पदाधिकारीका उम्मेदवारबारे छलफल हुने लेखकको भनाइ छ ।
कांग्रेस पदाधिकारीमध्ये एक सभापति, दुई उपसभापति, दुई महामन्त्री, आठ सहमहामन्त्रीको निर्वाचन हुने र एक कोषाध्यक्ष निर्वाचित केन्द्रीय सदस्यबाट निर्वाचित हुने पार्टी विधानको प्रावधान छ ।
यसैगरी, बुधबार बिहान नै कांग्रेसको संस्थापनइतर समूहले पनि महाधिवेशनका लागि आफ्नो समूहबाट सभापतिको एकमात्र उम्मेदवार बनाउने विषयमा छलफल गरिरहेको छ । सो समूहका नेता रामकृष्ण यादवका अनुसार बत्तीसपुतलीस्थित अनुपम फुडल्याण्डमा आफ्नो समूहका केन्द्रीय सदस्य, जिल्ला सभापति र पूर्व जिल्ला सभापतिहरुसँग राय–परामर्श गरी एक मात्र उम्मेदवार घोषणा गर्ने तयारी गरिएको छ । पौडेल समूह भनेर चिनिने कांग्रेसको सो समूहको बैठक साझा उम्मेदवार छनोटकै निम्ति मंगलबार नेता प्रकाशमान सिंहको निवास चाक्सीबारीमा बसेको थियो । आज साँझसम्म पौडेल समूहले सभापतिको साझा उम्मेदवार तय गर्ने बताइएको छ ।
