भाँडिएको एमाले सम्हालिएको छ : सूर्य थापा
नेकपा एमालेका केन्द्रीय सदस्य एवम् १०औं महाधिवेशन प्रचार कमिटीका सह–संयोजक सूर्य थापाले नेकपा एमाले पार्टी धेरै भाँडिएको स्थितिबाट सम्हालिएर लय पक्रिएको बताएका छन् ।
विभिन्न खालका अनुभवहरू संगाल्दै नेकपा एमालेलाई आजको बलियो स्थितिमा ल्याइपुर्याएको उनको भनाइ छ । आज मंगलबार आयोजित १०औं महाधिवेशनका लागि गठन गरिएको प्रचार कमिटीको अन्तिम बैठकलाई सम्बोधन गर्दै सह–संयोजक थापाले भने, ‘अघिल्लो स्थानीय तहको निर्वाचनको अनुभवहरूमा आधारित भएर हेर्दा र यहाँसम्म आउँदा हाम्रो अलिक पृथक अनुभव छ । यो बीचमा हामी धेरै भाँडिएको स्थितिबाट सम्हालिएका छौं ।’
‘नेकपा एमालेको पार्टी पंक्ति सग्लो, सवल र क्यावात भन्ने तरिकाबाट आएको भए आजको स्थितिभन्दा धेरै माथि पुगिने थियो,’ थापाले भने, ‘एकदमै भाँडिएको, आलोचनाका नाममा जे मन लाग्यो त्यही बोल्ने र गरेर हिँड्ने स्थितिबाट सम्हालिएर यति भएको हो ।’
अर्को प्रसङ्गमा थापाले प्रचार कमिटीमा रहेका कतिपय व्यक्तिहरू महाधिवेशनका बेला सम्पर्कमै नआएकोप्रति दुःख व्यक्त गरेका छन् । ‘पार्टीका महत्वपूर्ण इभेन्टहरूमा पार्टीले व्यक्ति नभइ व्यक्तिले पार्टी खोज्ने हो,’ थापाले भने, ‘चुनावमा, महाधिवेशनमा वा अर्को यस्तो कामको बेलामा व्यक्तिले पार्टी खोजेर आफूलाई सक्रिय बनाउने र आफ्नो भूमिकाले मान्छे नोटिशमा आउने कुरा हो ।
